Saattuartassat tamakkerneqarput
Sinerissamut qanittumi saattuartassat tamakkerneqarput taamaattumillu saattuarniarneq sapaatip-akunnerani matumani unitsinneqartussanngorpoq.
Allattoq Aaqqissuisoqarfik
Maniitsumi Kangaamiunilu sinerissamut qanittumi saattuarniarneq marlunngornermi aggustip 18-ianni unitsinneqassaaq, saattuarniarnermi sinerissamut qanittumi pisassiissutit 100 tonsiusut tamakkerneqarmata, Aalisarsinnaanermut Akuersissutinik Nakkutilliisoqarfik taama ilisimatitsivoq.
Marlunngorneq aggustip 18-iat ulloq kingullertut tunitsiviusussaavoq. Ullormi tunitsiviusumi kingullermi saattuarniutit kingusinnerpaamik qaqinneqareersimassapput.