Saattuartassat amerlineqarput
Sisimiut Maniitsullu eqqaani ukiumut saattuartassiissutit 400 tonsit julip qaammataanili nungunneqareermata, pisassat 200 tonsinik ilaneqarnissaannut Naalakkersuisut akuersissuteqarput.
Tamanna politikkikkut aalajangigaammat Pinngortitaleriffimmiit qanoq iliuuseqarfigineqarsinnaangitsoq, qanorlu kinguneqarsinnaanersoq, maannakkut takuneqarsinnaangikkallartoq Pingortitaleriffimmiit oqaatigineqarpoq.
Pinngortitaleriffiup aappaagu pisassat novemberimi siunnersuusiorfigissavai.
Sisimiut eqqaani ukiumanna pisassiissutit 200 tonsinik ilaneqarnerat kinguneqarnerlussagaluarpat soorlu saattuat qaleruaat aqiliulissagaluarpata aalisarneq ingerlaannaq unitsinneqarsinnaasoq, Aalisarnermut Piniarnermullu naalakkersuisoq Rasmus Frederiksen oqarpoq.
Sisimiut eqqaani Saattuartassiissutit nungunneqarmata pisassat 300 tonsinik ilaneqassasut KNAPK qinnuteqarsimagaluarpoq.