Nunatsinni saattuarniarfiit annersata Paamiuniittup Tunitsivik A/S-ip, ukioq manna Namminersornerullutik Oqartussat saattuanik pisassiissutaat suli tigusimannginnamikkit pakatsissutigaat.
- Pisassiissutit suli tigunnginnatsigit siumut pilersaarusiorsinnaanngilagut. Aamma aningaasanik missingersingersuusiorsinnaanngilagut, Tunitsiviup pisortaa Arvid Burhkal oqarpoq.
Taanna aamma oqaluttuarpoq, sulisutik suliassaqartinngisatik ullut tamaasa takuttartut, qaqugu aalisaleqqinnissartik paasiniaraluarlugu.
- Ilungersunartumik pakatsisitaavugut. Ila soorlu Namminersornerullutik Oqartussat soqutigissagaluaraat aningaasanik isaatitsisoqarnissaa, Arvid Burhkal oqarpoq.
Decemberip 30-ani Naalakkersuisut assagiarsunnik TAC-issat agguaappaat, taamaalillutik sinersissap qanittuani assagiarsunniartussat 4.200 tonsinnattut, avataasiortut 500 tons-inik EU-lu 1000 tons-inik pisassinneqarput.
Aalisarnermut Piniarnermullu Naalakkersuisup Finn Karlsen-ip kukkusoqarsimanera ilumoortuunerarpaa.
Nuup eqqaani Paamiunilu saattuartassat katillugit 1.800 tonsiupput.