Saattuarniarneq unikkallalerpoq

Kitaani saattuarniarneq juulip aallaqqaataaniit septembarip 15-ata tungaanut unitsinneqarallassasoq, Aalisarnermut pisortaqarfik nalunaareersorlu, Paamiuni aalisakkerivik ”Tunitsivik” siusinnerusukkut ilisimatinneqarsimanngimmat, ”Tunitsivik”-up pisortaa Arvid Buhrkal, narrujuummisimaqisoq ima oqarpoq.

- Taamatut tusarlerneqarnerput tupannartorujussuuvoq, allaanngilarmi tunukkut savimmik kapitilluni, Arvid Buhrkal oqarpoq nangillunilu: - Taamatut qoqassilluta aalajangertoqarnera inuit 50-it qaammatini marlunnik sinneqartumik suliffissaarunnerannik kinguneqassaaq.

Paamiuni aalisakkeriviup pisortaa aamma oqarpoq siusinnerusukkut ilisimatitsisoqarsimasariaqaraluartoq, ullullu 14-iinnaat piffissaralugit inuit suliffissuarmi sulisut suliffissaarunnissaannik nalunaartariaqalerneq naammaginanngitsutut Arvid Buhrkal-ip nalilerpaa.

Aalisarnermut pisortaqarfimmi immikkoortortami pisortaq Emanuel Rosing oqarpoq, saattuat aalisarneqartarnerisa ilaatigut qaammatit pingasut angullugit unitsinneqarallartarnissaat qangali aalajangiunneqarsimasoq, aalisakkeriviillu tamanna ilisimagaat ilanngullugu oqaatigaa.

- Taamatut aalajangiinermut peqqutaanerpaasimavoq, sapinngisamik saattuat qaleruaat aqilinerani aalisarneqartannginnissaat, 2004-mi 2005-milu TAC-mut tunngatillugu Naalakkersuisut aalajangerput susassaqartut sapinngisamik peqatigalugit anguniarneqassasoq qaammatini pingasuni aalisartarnerup matuneqarallartalernissaa, ukiorli kingulleq aalajangernerup taassuma piviusunngortinnissaa iluatsissinnaasimanngilaq. Ukioq mannali susassaqartut tamarmik ataatsimiigiaqquneqarsimapput, qanoq pisoqarnissaanik paasisitsiniaanertalimmik. Aalisarnerup unitsinneqarallarnissaa juunip arfernanili Naalakkersuisunit aalajangerneqarpoq, kisiannili allanik aamma ulapputeqaratta aatsaat ullumi tusagassiorfinnut nalunaarut nassiussinnaasimavarput, taama oqarpoq Aalisarnermut pisortaqarfimmi immikkoortortami pisortaq Emanuel Rosing.