Saattuaq a/s: Avataani aalisarfiit ukiuni pingasuni matullugit

Saattuarniarneq siunissaqassappat suli sakkortunerusumik killilersuineq pisariaqarpoq, allaallu avataani aalisarfiit ukiuni pingasuni matoqqasariaqaraluartut piginneqatigiiffiit ilaanni isumaqartoqarpoq.

Pingortitaleriffiup inassutai ullumi naalakkersuisunut tunniunneqartut naapertorlugit aappaagu saattuartassat 5000 tonsiusanngillalluunniit. Saattuarniarneq pileruttormat pilerngunnersuaq, peqassutsimillu ilisimasaqarani killeqangitsumik aalisartitsineq pissutaasut Saattuaq a/s-ip pisortaa Petrus Biilmann isumaqarpoq.

- Tamatta akisussaqatigiittariaqarpugut. Saatuarniarneq aallarteruttormat pilernguttoqarpallaarpoq, tamatumunngalu aalisartut, aalisariutaatillit, pisassiisartut ilisimatuullu pisooqataapput, Petrus Biilmann oqarpoq.

Saattuarniarneq 2000-mi aallarteruttormat 30.000 tonsit sinnerlugit pisassiissutigineqartarput. Taama ingerlasoqarsimanera kukkuneruvoq uteqqittariaqanngitsoq, Petrus Biilmann isumaqarpoq.

-Saattuaqassuseq misissullannguarnagu taamarsuaq pisassiisoqartarnerata kingunipilui maanna misigaavut, siunissamilu saattuarniarneq ataannassappat avataasiortut amerlanerpaamik tallimaasariaqarput, aalisarnerlu nakkutigilluarneqartariaqarpoq, Petrus Biilmann oqarpoq.

Pinngortitaleriffiup naalakkersuisunut inassutigaa Sisimiut Maniitsullu avataanni saattuarniarfiit aappaagu aalisarfigeqqusaassanngitsut, Petrus Biilmannilu isumaqarpoq aalisaqqusinnginneq ukiunik pingasunik sivisussuseqartariaqartoq