Saatsersunik sikoqartarnera annikilliartuinnarpoq

Silaannaap kissakkiartornera ilutigalu issittumi aasaanerani saatsersunik sikoqartarnera annikilligaluttuinnartoq, qaammataasakkut alapernaarsuisoqartalermalli uppernarsarneqarpoq; aasarmannalu aatsaat taama saatsersukitsiginiarunarpoq.

Silaannaap kissakkiartornera uumasoqarneranut pinngitsoorani arlaatigut ippinnaateqassasoq ilisimatuut naliliipput. Pingaartumik natsiit puttaaniiffissaqanngikkunik qanoq uumassanersut eqqoriaruminaappoq.

Sikuusarneranik immikkut ilisimasallit 120-t Canadami illoqarfimmi Winnepegimi massakkorpiaq isumasioqatigiipput. Peqataasullu ilaata David Barberip nalilerpaa, ukiut tamaasa immap sikua 74.000 km2i aattartoq.

-Siorna aatsaat taama saatsersukitsigaaq, ukiormannalu annikilleriarumaartoq, David Barber, nutaarsiassaqartitsivimmut CBC Avannaanut oqaluttuarpoq.

Immikkulli ilisimasallit isumaqarput saatsersuerukkiartornera iluaqutaaginnarsinnaassasoq, issittumimi aalisarneq annertusarneqarsinnaalissammat.