Saassussinikkut ujajaasut

Angut 23-nik ukiulik arfininngornerup ullaassaani nalunaaqutaq sisamap missaani Aqqusinersuarmi saassunneqarsimavoq. Nammineq nassuiaanera malillugu angutinit inuusuttunit pingasunit saassunneqarlunilu ujajaaffigineqarsimavoq.

- Oqarasuaataa angallattagaq kortillu assigiinngitsut tillinneqarsimapput, Nuup politiivini pigaartuusoq Kasper Berthelsen KNR-imut taama oqaluttuarpoq.

Saassunneqartorli tamatuma nalaani imigassartorsimasoq saassussisut qanoq isikkoqarnerinik oqaluttuarsinnaasimanngilaq. Politiilli suliaq suli misissorpaat.

Arnat aamma isertitsivimmi unnuisinneqarsimavoq politiit pillugit malittarisassamik unioqqutitsisimasutut. Politiinut akerartuisimavoq imerniartarfimmi Kajistiinaaqqamiit peqqarniitsumik pissusilersornini pillugu anisitaareerluni politiit takkummata taama pissusilersornini allanngortissimannginnamiuk. Isertitsivimmi unnuisinneqarnermi saniatigut akiliisinneqarnissani naatsorsuutigisinnaavaa. Politeeqarfimmi arnap kaasarfii imaarneqarmata aamma ikiaroornartumik hash-imik nassaarfigineqarpoq.

Taamatuttaaq angut pineqarpoq, politiit sulitillugit tallimanngornerup unnuaani akuliuttoq.

- Angut siorasaarerpalaartumik politiit tungaannut pissusilersormat politiit pillugit malittarisassamik unioqqutitsisutut tigusarineqarpoq akiliisinneqarnissanilu ilimagisinnaallugu, Kasper Berthelsen oqarpoq.

Taassuma ilanngullugu oqaatigaa persuutaanernik suliat arfineq marluk arfineq pingasut sapaatip akunnerata naanerinnaani politiit suliarisimagaat.