Saassussineq sakkortuseqqippoq
Israelimiut palæstinamiut najugaqarfiinut saassussinertik ullaaq-manna sakkortusivaat, nunaminertap Gazap avannarpasissuanut isaallutik ministerit Hamasikkunnut atasut arfineq-pingasut tigusarigamikkik.
Sakkutooq israelimiut 19-nik ukiulik, Gilad Shalit, palæstinamiunit sapaatiummat aallarussaasoq, israelimut sakkutuuisa suli ujaaraat.
Israelimiut saassussinerat palæstinamiut naalakkersuisuinut ”sorsunnertut”, imaluunniit ”sakkortuumik iliuuseqarnertut” Hamasikkunnit taaneqarpoq, palæstinamiut kamassarajuttut eqimattakkuutaat israelimiut nunasisoq aallarussaasimasut ilaat tamat takusinnaasaannik toqukkaallu.
Palæstinamiut ministeriisa arfineq-pingasut tigusaasut saniatigut Hamasimi inatsisartunut ilaasortat 20-t missaanniikkunartut israelimiut sakkutuuisa nunaminertami Vestbreddenimi aamma tigusarigaat, palæstinamiut sillimaniarnermi oqaaseqartartuisa ilisimatitsissutigaat.
Israelimiut saassussinerat USAp ippassaq unnukkut tapersersornerarneqarpoq, illuatungeriilli eqqisseqatigeeqqullugit EU Naalagaaffiillu Peqatigiit kajumissaaripput.
Præsidentip illorsuani oqaaseqartartoq, Tony Snow, oqarpoq, Israel imminut innuttaminillu illersuissalluni pisussaasoq, Hamasilu Tony Snowip kajumissaarpaa sakkutooq aallarussaq iperaqqullugu.
EU-p nunanut allanut ataatsimiititanut ilaasortaatitaata, tassa kommissæriata, Benita Ferrero-Waldnerip, israelimiut palæstinamiullu kajumissaarpai aaqqiagiinnginnertik annikillisassagaat.
