Saassussineq nalaatsornerinnaanngilaq

Algeriap illoqarfiisa pingaarnersaanni, Algierimi, ippassaq qaartartumeerineq nalaatsornerinnaanngilaq. Inuit ikinnerpaamik 62-it qaartartumeerinermi ajunaarsimassangatinneqarput, taakkununnga danskeq ataaseq ilaalluni.

Maanna tusagassiuutit nalunaarput, decembarip aqqarnat Afrikap avannaani ulloq eqqaamasassatut isigineqartariaqartoq, tassami ulloq taanna 1960-imi Algeria Frankrigimit nunasiaataagallarmat nunaqavissut akerliusunerminnik takutitsiviattut eqqaamaneqarpoq.

Taamani Frankrigimi præsidenti Charles de Gaulle Algeriamut tikeraarpoq, innuttaasullu akerliussutsimik takutitsinerat Frankrigimit avissaarnissamut aallaarniutaavoq.

Algeriamiut decembarip aqqarnat 1960 puigunngisaannarpaat, taamanimi inuusuttorpassuit akerliussutsimik takutitsisut franskit sakkutuuinit sakkortuumik saassutarineqarput.

- Taamaattumik ulloq taanna eqqorlugu peqqarniisaarniartoqarnera nalaatsornerinnaanngilaq, pissutsinik paasiniaasartut nutaarsiassaqartitsivimmut AP-mut oqarput.

Pissutsinik paasiniaasartut oqarput, islamimik upperisallit sorsukkumatuut, Algeriami oqartussat Frankrigimik Europamillu suleqateqarnera kamaatigalugu qaartartumeerinermikkut takutinniaraat. Frankrigimi præsidenti Nicolas Sarkozy Algeriami sapaatip-akunnera kingullermi tikeraarpoq.