Saarullittassiissutit 8000 tonsinik ilaneqarput
Naalakkersuisut allannerat naapertorlugu "isumaliutigeqqissaareerlugu" aalajangerput sinerissap qanittuani saarullittassat 8.000 tonsinik ilaniarlugit.
Biologit saarullittassiissutigineqartussatut siunnersuutaasa marloriaataanik ukioq manna saarullittassiisoqareersoq, saarullittassiissutit maanna tassa 8000 tonsinik ilaneqarput.
Aalisarnermut naalakkersuisoqarfiup allaaseraa Saarullittassiissutit ilaneqarnerinut ilanngullugu Naalakkersuisut suliniutinik assigiinngitsunik pilersitsissasut nunatta kitaani sinerissap qanittuani iluanaarutaasumik saarullinniarneq siunertaralugu.
Tusagassiuutinut nalunaarut naapertorlugu naalakkersuisut Kitaani sinerissap qanittuani saarullinniarneq iluanaarfiusinnaasoq siunertaralugu assigiinngitsunik suliniuteqarniarput.
Pinngortitaleriffik suleqatigalugu sinerissap qanittuani saarulliit annerusumik ilisimasaqarfiginerunissaanut ineriartortitsissapput, soorlu saarulliit suffisarfiini suffinerisa nalaanni aalisarfiunngitsumik pilersitsinikkut peqassutsimut pitsaasumik sunniuteqarluarsinnaasumik. Naalakkersuisut taama ilaatigut allaaserisaqarput.
Saarullittassiissutit 8000 tonsinik ilaneqarnerisigut, ukioq mannamut pisassiissutigineqartut 25.000 tonsiusimariarlutik 33.000 tonsinngorput. Allatulluunniit oqaatigalugu: Ukioq mannamut saarullittassiissutit 12.000 tonsiunissaannut biologit siunnersuutaasa pingasoriaatingajaannik maanna saarullittassiisoqarpoq.
