Assi: Nick Rahaim/Flickr Creative Commons

Saarullittassiissutit 3000 tonsinik ikilineqarnissaat Pinngortitaleriffiup inassutigigaa

Pinngortitaleriffiup saarulliit ikiliartuinnarnerat pissutigalugu 2020-mut pisassiissutissatut inassutigisami siornamut naleqqiullugit annertuumik ikilineqarnissaat inassutigaa.

Nunatsinni aalisakkat tulaanneqartartut Pinngortitaleriffiup killissarititassatut inassutigisaata iluaniiginnarnissaat ajornakusoortinneqarpoq.

Piujuaannartitsinissamillu tunngaveqarluni saarullinniarnissamut Pinngortitaleriffiup naatsorsuineri kingulliit malinnissaat siunissami ajornarsigaluttuinnassaaq.

- Tunup avataani sinerissallu qanittuani ikinnerusunik saarullittassiisoqarnissaa inassutigaarput, Pinngortitaleriffiup aalisakkanut qalerualinnullu immikkoortortaqarfiani pisortaq Helle Siegstad oqarpoq.

Nunatsinni 2019-imi saarullittassiissutit 12.158-iunissaat Pinngortitaleriffiup inassutigeqqaaraluarpaa, aappaagumulli saarullittassiissutigineqartut sisamararterutaannik 8.946 tonsinut ikilineqarnissaat Pinngortitaleriffiup maanna inassutigaa.

Aalisapilunneq kingunerlutsitsisarpoq

Saarullinnilli tulaanneqartartut Pinngortitaleriffiup inassutigisaanit amerlanerusarput. Pinngortitaleriffiup 2018-imut inassutigisai 20.296 tonsiugaluartut saarullinnik tulaanneqartut inassutigineqartut marloriaataanik sinnerneqarput - 41.544 tonsit tulaanneqarmata.

Ingasattumillu aalisapiluttoqarnera saarulleqassutsimut kingunerlutsitsivoq.

Saarulleqassutsillu peqqissup qanoq isikkoqarnissaa Helle Siegstadip ima nassuiarpaa:

- Saarulleqassuseq aalisarnermut naleqqiullugu pitsaasuussappat, saarulliit takkussortut amerlanissaat naatsorsuutigineqartariaqarpoq. Tassa angissusaat assigiinngiaartuussapput.

Nunatsinni saarulleqassutsimut tamarmiusumut tunngatillugu taamatut inissisimasoqaqqajanngilaq. Pingaartumik Tunup avataani saarulleqassuseq eqqugaaqqavoq, imartamilu tassani Pinngortitaleriffiup saarullittassatut inassutigisai ikileriffigineqarnersaapput.

- Ukioqatigiikkuutaat ikitsuinnaat tassani pisarineqartarput. Nalinginnaasumik ukioqatigiikkuutaat pingasut pisarineqartarput, mikisunillu pisaqartoqartarani. Taamaammat saarullinnik nutaanik takkuttoqarsimanngillat, Tunumullu tunngatillugu siornamut naleqqiullugu ikinnerusunik pisassiissuteqarnissamik inassuteqarnitsinnut tamanna pissutaavoq, Helle Siegstad taama oqarpoq.

Pisassiissutitut inassutigineqartut ikileriarnissaat Pinngortitaleriffiup ilimagereersimavaa, saarulliit suffisartut 2004-miilli ikiliartuinnavissimammata, 2003-miillu amerlerujussuarnerisa kingornali saarullinnik pisassiissutinngortussanik nutaanik takkuttoqarsimanngilaq.

Kitaata imartaani aamma assingusumik inissisimasoqarpoq - saarulliit sinerissap qanittuaniittut amerlassusaat - tassalu saarulliit kangerlunni suffisartut - 2015-imiilli ikiliartorsimammata. Tamatumunngalu peqatigitillugu saarulleeqqat pisarineqarsinnaasunngortussat (1-imik ukiullit) ikittunnguupput.

Ajalusoornerup kingorna iluarseqqinngitsut

Saarulliit Kitaata imartaaniittut saarullinnik avataaneersunik taaneqartarput. Kitaatalu sineriaata avataa siornatigut saarullinnianit aalisarfigilluarneqartarpoq. 50-ikkunni 60-ikkunnilu imartami tassaniinnaq saarulliit ukiumut 400.000 tonsit pallillugit tulaanneqartarput.

Tamannali 1970-ikkunni tassanngaannaq unippoq, saarulliimmi ataatsimoortorpassuit tammariataarput kingornalu taama amerlatigalutik takkuteqqinngillat.

Saarulliilli ataatsimoortukkuutaat amerlanngitsut suli tassaniipput. Pinngortitaleriffiullu aalisarneqannginnissaat ukiuni kingullerni arlalissuarni inassutigisarpaa. Tamatumunngali tunngatillugu allamik aamma pisoqarpoq. Saarullinnimmi 4187 tonsinik 2018-imi pisaqartoqarsinnaanera Naalakkersuisut akueraat.

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat