Saarullittani salluliuutigaa

Aalisartoq Hanstholmimiu saarulliup sananeqaataasa misissorneqarnerata kingorna 57.000 koruuninik akiligassinneqarpoq.

Aalisartoq Nordsømi unioqqutitsilluni aalisarsimasutut Thistedimi eqqartuussivimmi pineqaatissinneqarpoq.

Aalisartoq Østersømi aalisarsimalluni oqarsimavoq, saarullilli misissorneqareermat tamanna eqqunngitsoq paasineqarpoq.

Saarulliit sananeqaataat Østersømi Nordsømilu assigiinngitsut misissuinermi paasineqarpoq. Saarulliillu imaani nikeqattaartaraluartut aalajangersimasumiittarnerat taamaalilluni uppernarsineqarpoq.

Pineqaatissiissut Danmarkip avannaani aalisarnermut nakkutilliisoqarfimmit nuannaarutigineqarpoq. Aalisakkat sananeqaataasa taamatut eqqartuussisoqarnerani atorneqarsinnaanerat taamaalilluni aqqutissiuunneqarpoq.

- Aalisakkat sananeqaataasa tamatigut atorneqartarnissaat eqqartuussinermi siunertarinngilarput. Aalisarfinni aalajangersimasuni unioqqutitsilluni aalisartoqarsimanera pasitsaakkaangatsigu aalisakkat sananeqaataasa misissorneqartarneri aatsaat atortassavagut, Danmarkip avannaani aalisarnermut nakkutilliisoqarfimmi nakkutillisoq, Henrik F. Nielsen, oqarpoq.

57.000 koruuninik akiligassinneqarnermi saniatigut unioqqutitsilluni aalisagartarisimasami iluanaarutaasa nalinginut aalisartoq 150.000 koruuninik akiliisinneqassaaq.