Saarullinnik pisiortornertik unitsinnialerpaat
Maniitsoq Fiskeindustri A/S-imit saarullinnik pisiortorneq sisamanngorpamiit juulip ulluisa 23-anniit ualikkut nalunaaqutaq sisamaniit unitsinneqassaaq. Maniitsoq Fiskeindustri A/S-imi siulittaasoq Tønnes Berthelsen, pisortaagallartorlu Gerhardt Petersen tusagassiuutinut taama allapput.
Allattoq Mads Lynge
juulip 21-at 2009 15:00
Pisiortornermik unitsitsinermut tunngavilersuutit arlaqarput:
Saarulliit niaquerlugit erlaveerlugillu blokinngorlugit qerititat niuffaffinni akii appariangaatsiarput, saarulliillu pitsaassutsimikkut appasimmata, Gerhardt Petersen allappoq.
Kiffartuussinissamik isumaqatigiissutip Namminersorlutik Oqartussanit itigartitsissutigineqarnera ilaatigut pissutaalluni saarullinnik pisiortorneq aamma unitsinneqalerpoq:
- Soorunami ilisimavarput kiffartuussinermut isumaqatigiissut piffissamut sivikitsumut aaqqiinerusoq, taamaattoq aaqqiinerulluni siulersuisut periarfissamik ataavarnerusumik suliniarneranni periarfissiisoq, Maniitsoq Fiskeindustri A/S-imit ilisimatitsissutigineqarpoq.
