Saarullinniaq: Ikiligutta aalisarneq imminut akilersinnaanerulissaaq
Anton Egede inuttanilu pingasut ulluni arfinilinni angalanermi saarulliit 6 tonsit pisarai. Saarulliit kiilumut 5 kr.-nit 50 øreqarput, isertitaalu 33.000 koruuniupput. Taava orsussamut, neqitassanut ningittakkanullu atortorissaarummut akiliisussaavoq.
Tassalu ulluni arfinilinni aalisarnermi inuttanut sisamanut angallatillu akilersorneranut 18.000 koruunit sinnilaarlugit agguassavaat, suli akileraarutinut akiliinani.
- Saarullippassuit qaqinngikkaanni imminut akilersinnaanngilaq. Saarulliit eqqarsaatigalugit immaqa siunissaqanngilagut, Anthon Egede oqarpoq.
Taamaammat aalisartut ikinnerulernisaaannik ataatsimititliarsuup ilassutaa Anthon Egedep isumaqatiginartoqartippaa.
- Aasaanerani umiatsiaararpassuit aalisarnermut saattarput, taamaammat ikilisaasoqarpat uagutsinnut iluaqutassagaluarpoq.
Anthon Egedelli aalisakkat taama akilutsigitillugit aalisariutinik taarsersuinissaq takorlooruminaatsippaa, kinguaariit taarsernissaat allaat takorlooruminaatsillugu.
- Pilerinarsaasoqanngippat taartissaqanngilagut. Tapiissutit atuutsineqaleqqinngippata inuusuttut katersaqarsimanngitsut aallarteriarsinnaanngillat, aalisartoq oqarpoq.
Taamaakkaluartorli pikkorissut aalisarnermi ingerlaqqippata, aalisarneq immikut akilersinnaalissasoraa.
Aataatsimiisitaliarsuup siunnersuutigaa, aalisarunnaartut aatsitassarsiorfinni sulilissasut.
- Inuunerma annersaa aalisartutut inooreerlunga nunamut qaqillunga nunami sulilernissara eqqarsaatiginnaanngilara, Nuummiu aalisartoq Anthon Egede oqarpoq.