Saarulliit tarajortikkat tusaamasat tunisassiareqqinniarneqarput
- Tunitsivitta siornali matoqqaneratigut, ataatsimiissutigeqattaarneratigut, ammaqqinnissaanut neriunaateqartumik aaliangiisoqarpoq.
- Lilleholmip, Maniitsumi namminersortumik pigineqartup, tiguneratigut neriulersitsivoq, aalisartunut taavalu suliffissaaleqisunut, suliffissaqartitsiniarnikkut atuussinnaalersinnaasumik, ammaqqinnissaanut massakkut utaqqerujoorpugut suli, aalisartut aamma suliffissaaleqisut. Aalisartoq Apollo Møller oqarpoq.
Napasumi tunitsivik Royal Greenlandimit pisiarisimasartik kingusinnerpaamik juunip 15-iani ammassallugu, Lilleholmip Apriilimi nalunaarutigaa. Tunitsiviulli ammaqqinnissaanut nillataartitsivilerisussaq pissarsiariuminaassimasoq tusarlerneqarpugut.
Napasumi tunitsiviup sapaatit akunneri arlaqanngitsut qaangiuppata ammarnissaa Lilleholm A/S-ip ulluinnarni aqutsisuata, Jens Møllerip, naatsorsuutigaa.
Napasumi tunitsivik 1960-ikkunni Frede Sørensenimit sananeqarsimavoq. Tunitsivik ingerlalluartorujussuusimavoq, taamanilu saarulliit tarajortikkat suliarinerusarsimavaat. Saarulliit tarajortikkat Napasumeersut nerilluaataasimapput, nunarsuarmilu saarulliit tarajortikkat pitsaanerpaata tulliatut, norgemiut tunisassiaannut tullersortitut, taaneqarmat aningaasarsiutaalluarsimalluni.
Saarulliit saniatigut kapisillit, raajat qalerallillu Napasumi tunineqartarsimapput. Piginnittup nutaap, Lilleholm A/S-ip, saarulliit tarajortikkat tarajorterneqanngitsullu eqaluillu suliariniarpai.