Saarulliit siunnaat biologip specialimi allaaserisai
Saarulliit Nuup eqqaani pisaat saarulliillu Sisimiut eqqaani pisaat annertunerusumik assigiinngissuteqassangatinnanngikkaluarput, ilisimatusarnerulli nutaap takutippaa saarulleqatigiiaat taakku assigiinngissuteqartupilussuusut.
Saarulleqatigiiaani marluusuni siunnaat missuiffiginerisigut assigiinngussutaat oqaluttuarineqarpoq. Taakkununngami immikkoorlutik naqitsiniissaffiit naqitsinertuffiillu ingerlaartarfii naggataagullu taakkua silamut sunniutigisartagai apeqqutaalluinnarput, taamaattumillu assigiinngitsorujussuullutik. Saarulliit Nuup eqqaaniittut atlantikup avannaani naqitsiniissaffiit naqitsinertuffiillu ingerlaartarfiinit (NAO) sunnigaasarput, saarulliillu Sisimiut eqqaanni pisaat issittumi naqitsiniissaffiit naqitsinertuffiillu ingerlaartarfiinit (AO) sunnigaasarlutik. Tamatuma malitsigisaanik saarulleqatigiiaat taakku marluk alliartornerminni atugaat assigiinngitsupilussuupput taamaattumillu assigiinngitsupilussuullutik.
Saarulliit siunnai orpissuit assigalugit alliartornerinik aammalu utoqqaassusiannik takussutissiisunik ammalortunik titarneqarput. Tassa ukiumi ataatsimi alliartorluarsimariarlutik titarnerit ammalortut akorni silinnerusarput, nerisassaqarluarsimariarlutik imarlu kissarnerusimariaraangat atugassarissaarnerusarsimallutik. Taamaalilluni titarnerit taakku misissornerisigut nunatsinni silap kissassusia/nillissusia, pissarissaassuseq naggataagullu silap pissuserisimasaanut tunngassuteqartut paasisaqarfigineqarsinnaallutik.
Ukiut misissuiffigineqartut (1980-1996) nillingaatsiarfiusimasutut taaneqarsinnaapput, kingornalu ukiut misissuiffigineqartut (1997-2008) kissatsikkiartorfiusimallutik, taamanikkut imaq agguaqatigiissillugu 1,5°C missaannik kissatsissimalluni. Taamaattoqarsimaneralu saarullinnut imannarsuaq malunniussimanngilaq, kisiannili saarulleeqqat alliartornerinut sunniuteqarsimasoq takuneqarsinnaalluni. Tamaanili AO-p kisitsisaasa nikerarnerat aammalu saarulliit alliartornerat ataqatigiilluartutut isikkoqarpoq, uffa Nuup eqqaaniittut NAO-p nikerarneranut ataqatigiissuteqartoq erseqqittoq.
Tassa sumiiffik allisarfigisaq pingaaruteqartorujussuuvoq, aammalu silap pissusianik aqutsisuusut aalajangiisuusarnerat malunnarluarpoq, kisiannili kissassuseq nillissuserlu nikerartitsisuusarpoq.
