Saarulliit sananeqaataannut ilisarnaatitut takussutissanik ilisimatusartoq

Ilisimatuutut misissuisimasoq inuusuttoq, Nina Overgaard Therkildsen, Kalaallit Nunaanni saarulliit sananeqaataannut ilisarnaatitut takussutissanik ilisimatusarsimanerminut neriunaateqarluartumut DTU-p nersornaasiuttagaanik, "Young Researcher Award"-imik nersornaaserneqarpoq.
Allattoq Carla Davidsen
oktobarip 30-at 2012 13:06

Ilisimatusarneq Nunatsinni aalisartunut iluaqutaalersinnaavoq. Ilisimatuutut misissuisimasoq inuusuttoq, Nina Overgaard Therkildsen, Danmarks Tekniske Universitetimeersoq, Kalaallit Nunaanni saarulliit sananeqaataannut ilisarnaatitut takussutissanik ilisimatusarsimanerminut neruinaateqarluartumut DTU-p nersornaasiuttagaanik, "Young Researcher Award"-imik nersornaaserneqarpoq. Nina Overgaard Therkildsen ilinniarnertuunngorniarnermini Pinngortitaleriffimmi ukiuni arlalinni ikiortaasarpoq, angalaneranni peqataasarluni, ilisimatusarnerminullu atatillugu Nunatsinni Silap pissusaanik Ilisimatusarfimmi aamma sulisimalluni.

Aalisakkat maanna piusut sananeqaataat, Pinngortitaleriffimmit aalisartunillu katersorneqarsimasut, oqaluttuarisaanermi aatsaavissuaq misissoreerlugit, Nunatta imartaani saarulliit assigiinngitsut ikinnerpaamik sisamat kinguaassioqatigiinneq ajortut Nina Overgaard Therkildsenip ilaatigut uppernarsivaa:

Assigiinngitsut pingasut, Nunatta imartaani suffisartut, kingullerlu, Islandip imartaani aalisagaasoq, Nunattali imartaanut ilaatigut annguttartoq, tamaanili suffissanani.

Paasisat kingulliit inernerivaat, Kalaallit Nunaanni sinerissamut qanittumi saarullinnik 8.000 tonsinik 2013-imi pisassiisoqarsinnaanera Imavinni misissuinerit pillugit nunat tamalaat siunnersuisoqatigiiffiata, ICES-imik naalisarneqartartup, innersuussutigisinnaalermagu.

Misissuinerup inernerisa ajornanngitsunnguamik atorneqartalernissaat anguniarlugu Nina Overgaard Therkildsenip Pinngortitaleriffik maanna suleqatigaa. Saarullik aalisakkanut Nunatsinni suffisartunut, suffinerluunniit ajortunut, ilaanersoq ilaatigut sukkasuumik maanna misissorneqarsinnaalissasoq, DTU-mit ullaaq manna oqarput.