Saarulliit paniarsuttut allakkerivinnik ilungersunartorsiortitsipput

Tassami Savalimmiormiut aalisakkat taakku, sakkortoorujussuarmik tipillit, juullilernerani ilaquttaminnut Danmarkimiittunut karsikkaarlugit nassiussuuttarpaat. Ajornartorsiutaalersorli tassaavoq, saarulliit tarajortikkat paniarsuttut tamakku, ilaat tipittorujussuit, iluamik poortornagit nassiunneqartarmata.

Nassiussat Savalimmiuneersut saarullinnik tarajortikkanik paniarsuttunik imallit, putusoorsimagaangata, allakkerisarfimmi sulisut tamarmik aniatinneqartariaqartartut, aviisimi Berlingske Tidendemi allaaserineqarpoq.

- Savalimmiormiut paqqaartuutaat ima tipitsigisarput, aalisakkat sumiiffissinissaasa tungaannut allakkanik poortukkanillu immikkoortiterineq tamarmi unitsinneqartariaqartarluni, taama oqaluttuarpoq Post Danmarkimi tusagassiinermut pisortaq Lars Kaspersen.

Allakkat poortukkallu Savalimmiuneersut umiarsuarmik Aalborgimut apuunneqartarput, tassanngaanniillu allakkanik poortukkanillu immikkoortiterivimmut Jyllandip qiterpasinnerusortaaniittumut ingerlateqqinneqartarlutik. Tassani pisortaasoq Kate Kruse oqarpoq, poortukkat tamakkua alittoorsimasut narlanngunarluinnartartut.

Taamaattumik Savalimmiormiut juullilernerani kissaateqarfigai, saarulliit tarajortikkat paniarsuttut karsinut puunnginnerini plastikkimik pooqqaartaqqullugit.