Saarulliit panertut barteeriallit

Saarulliit panertut 1300 kiilut kujataani Pilersuisup pisiniarfiini tallimanngormat piaartumik peerneqarput, paasineqarmat panertut pisoqalinermikkut barteerianik inuussutissaniittartunik killigititaasoq qaangerlugu peqalersimasut, Pilersuisup tuniniaanermi pisortaa Bernhard Petersen ilisimatitsivoq.

Bernhard Petersen oqarpoq barteeriat pineqartut saarullinnik panertunik tunisassiorfimmeersuunissaat naatsorsuutigineqartoq. Saarulliit panertut barteeriaqalersimasut Nuummi tunisassiorfimmit Nujussimeersuusut Bernhard Petersen oqarpoq.

Nujus-ip piginnittua Mikael Petersen oqarpoq saarulliit panertut Pilersuisumut tunisamik isugutasumiitinneqarnermikkut barteeriaqalersimanissaat ilimanartoq.

Mikael Petersen-ip erseqqissarpaa kujataani massakkut pineqartut eqqaassanngikkaanni Nujus-imi tunisassiatik pillugit allanit naammagittaalliuteqartoqarnikuunngitsoq,

Nujus-illu tunisassiai Pilersuisumit utertinneqareerpata misissuisoqarnissaat ajornassanngitsoq, Mikael Petersen oqarpoq.