Saarulliit ikinnerulerpata raajat amerlanerulissapput
Siunnersuut isumassarsiaavoq raajat ikiliartornerannut taarsiullugu aalisarneqarsinnaanerat, soorlu uumassusilerisut sapaatip akunnerata siuliani taama innersuussaqartut.
Raajat 80.000 tonsit ukiormanna aalisarneqarsinnaanerat uumassusilerisunit innersuussutigineqarpoq, raajartassat aappaagu 60.000 tonsinut ikilisinneqassasut innersuussutigineqarluni appariarneq 25 procentiulluni.
Kitaani saarulliit raajanik 15.000 tonsinik ukiumut nerisarsimanissaat eqqoriarneqarpoq taakkualu raajarniartartunit aalisakkanik suliffissuarni inuiaqatigiinnilu kalaallit nunaanni tamarmi annaaneqartarput. Taamaattumik Sulisitsisut peqatigiiffiata isumassarsiaralugu siunnersuutaa Aalisarneq pillugu Siunnersuisoqatigiinni tapersersorneqarpoq, tassalu saarullittassat amerlineqassasut, siunnersuut taana KNAPK-mit Royal Greenlandimit Polar Seafood Greenlandimillu tapersersorneqarpoq.
Sinerissap avataani saarullinniartoqannginnissaq uumassusilerisunit siunnersuutigineqaraluarpoq sinerissap avataani suffisoqartalernissaanik periarfissiinissaq angorusunneqarmat.
GA-mit pilersaarutissatut missingiut imatut oqariartuuteqarpoq, tassalu saarullinnut aqutsinissamut pilersaarutaasoq allanngortinneqassasoq, taamaasilluni sumiiffinni kitaata avataani saarulleqassutsip pilerseqqikkiartuaaqqinnerani sukkassuseq annikillisinneqarluni.
Ukiumoortumik 25000 tonsinik aalisarnerup kingunerissavaa aalisagaqassutsimit 11 %-ngajannik ilanngartuisinnaaneq, tamannalu naammaginakannersunik uumassuseqarnermut sinaakkusiussat iluini illersorneqarsinnaasutut isigineqarpoq, Aalisarneq pillugu Siunnersuisoqatigiit tusagassiuutinut nalunaaruteqarlutik taama allapput.
- Avataani saarulleqarluarpoq uumassusilerisut naliliinerannit amerlanerusunik , Sulisitsisit peqatigiiffianni GA-mi aalisarneq pillugu ataatsimiititaliami siulittaasoq Henrik Leth KNR-imut ataasinngormat oqarpoq.
Aalisarneq pillugu siunnersuisoqatigiit erseqqissaatigaat siunnersuutip kitaani raajarniarnermi MSC-mik piujuartitsilluni uppernarsaasersuineq 2013-imi anguneqartoq akornusersorneqassanngitsoq, Aalisarneq pillugu Siunnersuisoqatigiit siulittaasuat Petrus. H. Biilmann tusagassiuutinut nalunaaruteqarluni taama allappoq
