Saarulliit ikilinerat: - Kangaatsiami aalisarneq uninngasutut isikkoqarpoq
- Tassa maani Kangaatsiami massakkut aalisarneq uninngasutut isikkoqartoq oqarsinnaavunga, piniartut aalisartullu peqatigiiffianni KAPP-mi siulittaasoq, Ole Siegstad, oqarpoq.
Saarulliit Kangaatsiami tunitsivimmut tunineqartartut 2012-ip kingorna amerliartupiloortut Naatsorsueqqissaartarfiup kisitsisaataasa takutippaat, 2017-imilu 5.000 tonsingajaat tunineqarput.
AAMMA ATUARUK Kangaatsiami aalisartut tunisinissamut periarfissanik pitsaanerusunik ujartuisut
Tamatumali kingorna tunineqartut ikiliartoqqipput, siornalu 3.000 tonsingajaat tunineqarlutik.
Ukiorlu manna amerlisimarpasinngillat.
- Maani nalitsinni saarulliit ukioq manna aggustusiuliinartoq tammarnikuupput. Takkutilaartaraluarput kisianni ingerlaannaq aamma tammakaaqqittarput, Ole Siegstad oqarpoq.
Ukioq manna septembarip naanissaata tungaanut 1.000 tonsit sinnilaarlugit tunineqarput.
Saarulliillu ikiliinnaratik aalisarneqartut mikinerulersimasut KAPP-p siulittaasuata maluginiarpaa.
- Takkuteruttoramik angisoorujuit takkusimaarnikuupput. Angisoorujuit. Ukiuni kingullerni akuugaluarput, kisianni mikinerit ikannerullutik, Ole Siegstad oqarpoq.
AAMMA ATUARUK Kangaatsiami suliffissuaq amerlanerusunik suliffissaqartitsilersoq
Tamanna aamma Royal Greenlandip Kangaatsiami tunitsivianit malugaat.
- Ukioq manna eqqaamaniakkanni juulip tungaannaanut saarullilerivugut nerpiliorluta. Taava aggustusiminngaanniit maannamut pisiortorpallaanngilagut annikitsuaqqat sukkut tamaana, Royal Greenlandip Kangaatsiami tunisassiorfiata pisortaa, Jørgen Inusugtoq oqarpoq.
Tunisassiorfimmi sulisut 20-upput. Saarulleqanngikkaangat angerlartinneqartarput.
- Soorunami suliassaqannginnerani sulisut angerlarallartitaanikuupput. Kisiannilu massakkut tunisillattaarneratigut suliartornikuupput. Saarullissaarukkaangatta angerlartikkallaanartarpagut suliassaqartikkunnaarlugit, Royal Greenlandip Kangaatsiami tunisassiorfiata pisortaa, Jørgen Inusugtoq oqarpoq.
AAMMA ATUARUK Royal Greenland lukker fabrikker
Kangaatsiami eqqaanilu saarulliit anginerit ikilineri aamma Kommune Qeqertalimmit malugaat. Aalisartut tunitsivinnilu sulisut isertitaat ikinnerummata piareersaalereerlutik, borgmesteri Ane Hansen oqarpoq.
- Suliassat, suliffeqarfinnullu eqaatsumik nuttarsinnaaneq aamma eqqarsaatigalugu nutaamik allatut ittumik eqqarsartariaqalernikuuvugut, Ane Hansen taama oqarpoq.
Kommune Qeqertalillu inuussutissarsiuutinik ineriartortitserusuttoq borgmesterip oqaatigaa.
-Tamanna pillugu inuussutissarsiornermik siuarsaanermut tunngasumik suliffeqarfimmik pilersitsinissamut kommuni ukioq manna immikkut ittumik 3,2 millionit koruuninik aamma aningaasaliinikuuvoq, aamma aappaagukkunni taamatut aningaasaliissamaarluni. Taavalu aamma sillimmatit immikkut ittumik aningaasaliinissanut aappaagumut siunnersuuteqarluta, Ane Hansen oqarpoq.
