Saammaateqatigiinnissamut isumalioqatigiissitap oqaluttualiaaqqanik unammisitsinerani ajugaasut toqqarneqartut

Unammisitsinermi peqataasut inuiaqatigiinni pissutsit aallaavigalugit Nunatsinni oqaluttuarisaanerup ineriartorneranik oqaluttuaaqqanik juunip qaammataanit septembarip qaammataanut suliaqarnissaminnut periarfissinneqarput.

Oqaluttuaaqqat saammaateqatigiinnissamut tunngassuteqartussaatinneqarput, Nunattalu saammaateqatigiinnissaq eqqarsaatigalugu siunissami qanoq inissisimanissaa allaaserisaqartussaalluni.

- Uagutsinnut pingaaruteqarsimavoq innuttaasunik peqataatitsinissarput oqaluttuaaraliornermik unammisitsinikkut “Issittup sapangaa”-nik qulequtaqartumik. Innuttaasunik akuutitsinerup isumalioqatigiissitami sulineq nukittorsarpaa, aammalu innuttaasunik qaninnerusumik attaveqarnermut iluaqutaalluni, Saammaateqatigiinnissamut isumalioqatigiissitami siulittaasoq Josef Therkildsen taama oqarpoq.

1., 2. aamma 3.-nngortut akissarsitinneqassapput marlunngornermi novembarip 29-ani, nal. 16.30-18.00 Katuami Ikinngutigiit Inaanni.