Saammaateqatigiinnissamut Isumalioqatigiissitap malinnaatitaasut ataatsimeeqatigai

Saammaateqatigiinnissamut Isumalioqatigiissitap Isumalioqatigiissitap sulineranik malinnaatitaasussatut toqqarneqartunik siullermeertumik ataatsimeeqaqqammerpoq.
januaarip 22-at 2015 08:55
Nutserisoq Simon Uldum -

Malinnaatitaasut inuttaligaapput Inatsisartuni partiit ilaasortaatitaqartut toqqartugaannik, tassaappullu Mikael Petersen, Siumut, Inuit Ataqatigiinnit Sara Olsvig sinnerlugu Juliane Henningsen peqataavoq, Hanne Rasmussen, Demokraatit, Ove Frank Heilmann, Atassut kiisalu aamma Per Rosing-Petersen, Partii Naleraq.
 
Ataatsimeeqateqaqqaarnermi isumalioqatigiissitamit anguniakkat aamma suleriaasissatut siunniussaq malittarinnittunut saqqummiunneqarput.

Ataatsimiinneq pissarsiffiulluartoq
Aviâja Egede Lyngep saammaateqateqatigiinnissamut isumalioqatigiissitameersup malinnaatitaasussanik ataatsimeeqateqarneq pissarsiffiulluarnerarpaa.
 
- Isumalioqatigiissitap ataatsimut isummiussaat saqqummiuppavut aamma 2017-ip naanissaanut siunnerfittut pilersaarusiatsinnik saqqummiussivugut isumalioqatigiissitap suliassamik ingerlatsinissaanut tunngaviusussamik, isumalioqatigiissitap suliassaani allassimasoq naapertorlugu. Partiit sinniisaat tamarmik isummersuutinik siunnersuutinillu saqqummiussipput suliamik ingerlatseqqinnitsinni qularnanngitsumik iluaqutaallutik kinguneqartitsilluartussanik, tusagassiorfinnut nalunaaruteqarluni taama allappoq.
 
Isumalioqatigiissitap suliamik ingerlatsinermini killiffimminik ilisimatitsisarnerata saniatigut Isumalioqatigiissitap ukiumut marloriarluni malinnaatitaasut ataatsimeeqatigisassavai.