Saammaateqatigiinnissamut isumalioqatigiissitap inassutai arfineq-marluk

- Nunatta nunasiaataasimanera qaangerniarlugu saammaassinissaq isumakkeerinninnissarlu pisariaqarpoq. Tamannalu pillugu iliuusissanik pilersaarusiortoqassaaq.

Naalakkersuisooqatigiinnissamut isumaqatigiissummi 2013-imeersumi taama allassimasoqarpoq – tamannalu malillugu Nunatta saammaateqatigiinnissamut isumalioqatigiissitaa ilusilerneqarpoq.

Isumalioqatigiissitap saammaateqatigiinnissaq assigiinngitsunik suliniuteqarfigalugu 2014-imit 2017-imut ukkataraa. Inuiaqatigiinni unammillernartut nunasiaataasimanerullu malitsigisaanik akerleriissutaasut qulaajarnissaat siunertaavoq. Tamannalu inuiaqatigiinnut ataatsimiititsinikkut, saqqummiinikkut apersuinikkut isumalioqatigiissitallu nunatsinni angalanerani oqallittoqarneratigut ingerlanneqarpoq.

Isumalioqatigiissitap suliaqarnera naalakkersuisunut arfineq-marlunnik inassutitaqartumik nalunaarusiornikkut 2017-imi decembarimi naammassineqarpoq. Isumalioqatigiissitami ataqqinaammik ilaasortap, Karla Jessen Williamsonip oqarnera naapertorlugu inassutit politikkikkut malinneqanngillat.

Inassutit uani atuarsinnaavatit:

Inassut nr. 1: Kalaallit Nunaata oqaluttuassartani nammineq oqaluttuarissavaa

Isumalioqatigiissitap nunatsinni qangaanerusoq pisut oqaluttuarineqarnissaat siunertaralugu, inuiattut siunnerfimmik iliuusissatullu pilersaarummik ineriartortitsisoqassasoq inassutigaa.

Isumalioqatigiissitap oqarnera naapertorlugu Australiamit isumassarsiortoqassaaq. Matumani nunap inoqqaavisa namminneq oqaluttuarisaanertik, kulturertik naleqartitatillu pillugit atortussanik pissarsiariuminartunik suliaqarsimapput. Isumalioqatigiissitallu nunatsinni assingusumik suliniuteqartoqaqquaa. 

Inassut nr. 2: Ilisimasanik katersivik

Isumalioqatigiissitap oqaluttuarisaaneq saammaateqatigiinnerlu pillugu ilisimasanik katersivimmik Ilimmarfimmi pilersitsisoqarnissaa inassutigaa.

Innassut nr. 3: Aningaasaateqarfik
Isumalioqatigiissitap saammaateqatigiinnermut aningaasaateqarfimmik pilersitsisoqarnissaa inassutigaa. Aningaasaateqarfiup ilisimatusarneq suliniutillu saammaateqatigiinnissamut tapertaasussat tapersiiffigissavai.

Inassut nr. 4: Naleqartitat ataatsimoorussat

Isumalioqatigiissitap ileqqorissaarnermut siunnersuisooqatigiinnik nunatsinni naleqartitanik suliaqartussanik pilersitsisoqarnissaa inassutigaa.

Inassut nr. 5: Oqaatsit
Isumalioqatigiissitap inuiaqatigiinnut tamanut annertuumik suliniuteqartoqarneratigut kalaallit oqaasiisa nukittorsarneqarnissaat inassutigaa.

Inassut nr. 6: Utoqqatsertitsinissamik kissaat
Innuttaasut ilaat, ingammik kinguaariinni utoqqartaasut Saammaateqatigiinnissamut Isumalioqatigiissitamut oqaatigaat, ineriartornerup aqqani pineqarsimanertik pillugu utoqqatserfigineqarnissartik pissusissamisuussasoq.

Taamaammat isumalioqatigiissitap Naalakkersuisut apeqqummut tassunga oqallitsitsinermik suliniuteqarnissaat inassutigaa. Taanna innuttaasut tamarmik isumaannik saqqumersitsiniarnermut qulakkeerutaassaaq.

Inassut nr. 7:  Innuttaasut paasissutissiiffigineqassapput

Isumalioqatigiissitap innuttaasunut ataasiakkaanut sunniuteqartussanik inuiaqatigiinni allannguinernik annertuunik pilersaarusiortoqartillugu ’innuttaasut kiffaanngissuseqarlutik, sioqqutsisumik aamma paasissutissiisumik akuersinissamut’ pisinnaatitaaffeqarnissaat qitiusumit aqutsisoqarfimmit taassumalu ataani suliffeqarfinnit siunissami qulakkeerneqartarnissaa Naalakkersuisut qulakkeertariaqaraat, inassutigaa.

Paasissutissarsiffik: Saammaasseqatigiinnermut isumalioqatigiissitap isumaliutissiissutaa
 

Isumalioqatigiissitap isumaliutissiissutaa tamaat uani atuarsinnaavat.