Saammaateqatigiinnissamut isumalioqatigiissitami ataqqinaammik ilaasortaq, Karla Jessen Williamson isumalioqatigiissitami aallaqqaataaniit naammassinissaanut ilaasortaasimasut marluk ilagaat.

Saammaateqatigiinnissamut Isumalioqatigiissitamiissimasoq: Sooq suli utoqqatsertoqanngila?

Meeqqat misilittaatitigineqarsimasut suli utoqqatserfigineqannginnerat Saammaateqatigiinnissamut Isumalioqatigiissitami ataqqinaammik ilaasortaasimasup paasisinnaanngilaa. Utoqqatserfigineqarumaartut, naalakkersuisoq oqarpoq.

Nunatsinni innuttaasunik 33-riarluni ataatsimiisitsinerit inunnillu 58-inik apersuinerit Saammaateqatigiinnissamut Isumalioqatigiissitap Naalakkersuisunut 2017-imi inassutaasa arfineq-marluk imarisaannut sunniuteqaqataapput.
Isumalioqatigiissitaq nunatta nunasiaasimanerata kingunerinut tunngatillugu saammaateqatigiinnissap inuiaqatigiinnilu ajornartorsiutit qaangernissaasa ukkanneqarnissaat siunertaralugu pilersinneqarpoq.

Innuttaasorpaaluit Saammaateqatigiinnissamut Isumalioqatigiissitap ukiut sisamangajanni sulinerata ingerlarngani utoqqatseqqusipput. Tamatumani kalaallit meerartaat qallunaanngorsagaajartortillugit misilittaatigineqarlutik Danmarkiliartitaasimasut, kalaallillu pinngitsaaliissummik nuutsitaasimasut utoqqatserfigineqarnissaat pineqarput. Isumalioqatigiissitap tamanna inassutimini ilannguppaa.

Taamaakkaluartoq taakkua maannamut suli utoqqatserfigineqanngitsut, Karla Jessen Williamson erseqqissaavoq. Taanna Saammaateqatigiinnissamut Isumalioqatigiissitami ataqqinaammik ilaasortaanikuullunilu nunat inoqqaavi nunanilu tamalaani kulturit pillugit Canadami ilisimatusarfimmi, University of Saskatchewanimi, maanna ilinniartitsisuuvoq.

- Kalaallit naalakkersuisui eqqugaasimasut taarsiiffigineqarnerannik kinguneqaratarsinnaasumik utoqqatsertoqarnissaanik noqqaanissaminnik naviattassimanersut ilisimanngilara, taanna oqarpoq nangillunilu:

- Imaanngilaq taarsiiffigineqartariaqassasut. Utoqqatserfigineqarnissaat tujorminartunillu nalaataqartitaasimanerannik miserratiginnittoqarunnaarnissaa pingaarneruvoq.

Utoqqatserfigineqarnissaat kinguartinneqartoq

Ilinniartitaanermut, Kultureqarnermut Ilageeqarnermullu Naalakkersuisoqarfik Saammaateqatigiinnissamut Isumalioqatigiissitap inassutaanik malitseqartitsinissamut akisussaasuuvoq. Danskillu meeqqanut misilittaatigineqarsimasunut utoqqatserumaartut, naalakkersuisoq Karl Frederik Danielsen (Siumut) KNR-imut allakkatigut akissummini ilisimatitsivoq.

Danskit ministeriunerata kalaallit meerartaat 22-t 1951-imi kulturikkut misilittaanermi Danmarkiliartitaanerannik qulaajaaneq utaqqivaa. Qulaajaanerli coronavirusip tuniluunnerani ajornartoorneq peqqutigalugu kinguartinneqarpoq, aatsaallu qulaajaasoqareerpat ministeriuneq utoqqatsissalluni.

- Danskit ministeriunerat, Mette Frederiksen, tamatumunnga atatillugu 2020-mi aggustip qaammataani utoqqatsissamaarsimagaluarpoq. Innuttaasulli covid-19-imik tunillatsinnginnissaat eqqarsaatigalugu tamanna piffissaligaanngitsumik kinguartinneqarsimasoq, Karl Frederik Danielsen akissummini allappoq.

 

Karla Jessen Williamson Canadami ilisimatusarfimmi, University of Saskatchewanimi, professorimut tullersortaalluni ilinniartitsisuuvoq. Ilisimatusarfimmi tassani professoriusoq siusinnerusukkut allapparput. Tamannali maanna naqqiutigaarput.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat