Saammaateqatigiinneq pillugu isumasioqatigiinneq
Isumasioqatigiinneq Saammaateqatigiinneq Akerleriinnerullu aaqqinneqarnissaat pillugit, ullumi inuit tyve-t missaanniittut peqataaffigisaannik ingerlanneqarpoq. Jan Øberg inuiaqatigiit aaqqissugaaneri pillugit filosofi-imi doktor-iusoq isumasioqatigiisitsisuuvoq.
Inuiaat naleqassutsiminnik misigissusaat aatsaat annertusiartortarpoq oqaluttuarisaanertik saammaateqatigaatsigiiffigigunikku. Tamanna nunarsuatsinni nunasiaasimasut takutippaat. Qatsupparput eqqugaasimasutut misigisimajuarnerput imminullu naleqassutsimik misigisimaneq aatsaat takkuttarpoq, qanga pisut saammaateqatigiiffigigaanni. Taama qulequtaqarpoq isumasioqatigiinneq Toscanami Italiamiittumi siullermik ingerlanneqartup nanginnera. Juaanna Petrussen isumasioqatigiinnermut peqataasoq isumasioqatigiinneq pillugu oqarpoq, inuiaqatigiit akunnitsinni akerleriissutaasinnaasunut mattuttoortarnerput, ilaatigut ammasumik ajornartorsiutinik oqaloqatigeereerluta ingerlariaqqinnissaraluatsinnik unitsitsisartoq.
-Inuttut ataasiakkaatut ajornartorsiutit tamatta ulluinnatsinni annertoorujussuarmik inituujupput, tamakkulu ammasumik eqqartorlugit ingerlaqqittuugutta oqaloqatigiissutigisinnaasuugutsigit ulluinnarput aamma taamatut oqilisaanneqarsinnaassagaluarpoq, Juaanna Petrussen oqarpoq.
Juaanna Petrussen-i isumaqarpoq kulturit marluk akornanni kisimi ajornartorsiutit ataannarsimanngitsut aammali innuttaasut iluminni. Pingaartutullu tikkuarneqartoq Danmarkimiit allaffissornikkut periutsit atorlugit ingerlagatta kingunerigaa innuttaasut naligiinnginnerannut naligiinnginnerullu suli annertusiartorneranut. Tamakkulu akueralugit saqqummiullugit qaangerniartariaqarpagut.
-Pingaartorujussuartut saqqummiuneqartut ilagaat, qanoq pingaaruteqartiginersoq, soorlu arlaatigut nikanarnerusutut inissisimanermiit anillannissaq, upperilernissaq ”uanga sapinngilanga”. Tamanna inuppassuit atugarivaat aamma qanoq iliuuseqarfigineqarnissaa pingaartutut oqaatigivarput, uangali toqqaannartumik oqaatigisinnaanngilara massakkut qanoq iliorneqassasoq, Juaanna Petrussen oqarpoq.
Suleqatigiit amerliartorusaarput isumaavorlu inuiaqatigiinnut siaruariartornissaa oqallisigineqalernissaalu. Unnugu Katuami innuttaasut ataatsimiisinneqassapput saammaateqatigiinneq pillugu.
