Saamit tusagassiortut nersornaatisipput

Saaminut tusagassiortunut nersornaasiuttagaq siullermeerluni siorna tunniunneqarmat nersornaatisisut tassaapput qatanngutigiit Samuel aamma Mariela Idivuoma, silap pissusaata allanngoriartorneranut tunngatillugu aallakaatitassiorsimasut - aallakaatitassiaat taaguutillit 'Det nye vejrs offer'.
Allattoq Elisa Isaksen
januaarip 19-at 2010 09:45

- Taamatut nersornaatisilluni tupaallannaqaaq, nuannaajallannaqaluni ataqqinaataallunilu, Samuel Idivuoma, Kirunami SVT Sápmi-mi tusagassiortuusoq oqarpoq.

Silap pissusaata allanngoriartornerata kinguneranik, Issittumi nunap inoqqaavisa assigiinngitsut inuunermi pisariaqartitaasa qanoq allanngornerat, aallakaatitassiani pineqarput.

Nersornaasiinissamik aalajangiisartut, nersornaasiinerminnut ilaatigut tunngavilersuutigaat, aallakaatitassiat oqariartuutigisaat ersarimmat assitarissaarlutillu. Tamatuma saniatigut oqaluttuarineqartuni ullutsinni inuunerup ileqqutoqqallu imminnut tulluartumik oqaluttuarineqarmata.

Nersornaasiunneqartoq Norgemiut koruuniinik 30.000-inik aningaasartaqartoq, Saamit tusagassiorfiini aaqqissuisunit, Norgemi NRK-mit, Finlandimi YLE-mit, Sveriges Radiomit aamma Sveriges Televisionimit pilersinneqarpoq. SVT - Sveriges Televisionimi - taama allaaserinnittoqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq