Saamit oqaasii uummarissaqqinniarneqarput

Nalunaarusiaq, sapaatip akunnerani kingullermi saqqummersinneqartoq, nunat inuii pillugit Naalagaaffiit Peqatigiiffiannut immikkut nalunaarusiortartup, professor James Anayap, nalunaarusiaraa. Aviisimi Barents Observerimi taama allaaserinnittoqarpoq.

Aningaasanik siunertaasunut naammattunik Nunat Avannarliit saamit naalakkersuisoqarfiinut maannakkorpiaq tapiinissaat taassuma kaammattuutigaa, saamit suliniutissanik maannangaaq pilersaarusiorsinnaaniassammata.

Taamatulli piumasaqareerluni Norgep, Sverigep Finlandillu nunat inuiinut atugassarititaasut eqqummaariffigimmatigik, nunallu inuiinut atatillugu suliniutigisartagaat nunanut allanut maligassaanerarlugit, Anayap nersualaarpai, tamakkualu nunat inuiisa pisinnaatitaaffii pillugit suliniarnermi oqilisaaqataanerarlugit.

Saamit naalagaaffinni arlalinni najugaqaraluarlutik, kultureqatigiittutut oqaatsitigullu imminnut qaninnermikkut inuiattut ataatsitut imminnut suli isigipput. Saamit oqaatsimikkut sumiorpalussusaat qulingiluannngorlugit agguataarneqarsinnaapput, Naalagaaffinnulli Peqatigiinnut nalunaarusiami taakkua ikiliartuaarnerarneqarput.

Naalagaaffiit assigiinngitsut saamillu naalakkersuisoqarfii suleqatigiillutik naggueqatigiit saamit pillugit ilisimanninnerup tusagassiuutitigut annertusarnissaa nalunaarusiami siunnersuutigineqarpoq, atuarfinnilu ilinniagassanut ilanngunneqarnissaa aamma innersuussutigineqarluni.