Saamit kalaallillu qitiutigaluni isiginnaartitsissusiaat Nunatta Isiginnaartitsisarfiani takuneqarsinnaassaaq
Kalaallip isiginnaartitsisartup Elisabeth Heilmann Blindip, isiginnaartitsissusiaq "Angerlarsimaffeqanngitsoq" takutissavaa.
Meqqu arnaavoq angakkoq silarsuarmi angalasoq Kalaallit Nunaata kitaani nunaqarfeeqqameersoq. Taassumalu arnap angalanermini suliassarivaa angutip inuusuttup tarnera annaanneqarsinnaajunnaarnikoq utertissallugu.
Isiginnaagassiaq una inuttut inuunermi iluatsinngittuukkanut qaleriiaattunut tungasuuvoq, taamaakkaluartorli makeriaqqissinnaaneq inuunermilu siumut aallarsinnaaneq inuunermillu inuunererusutamik inuuneqalernermut tunngasuullunittaaq.
Isiginnaagassiaq piviusuusaartitaavoq, Elisabethillu inuunermini misigisartagaanit nunatsinnilu kinguaariit akornanni naapinnernit qanga ullutsinnilu pisunit isumassarsiaalluni. Nunatta Isiginnaartitsisarfia taama allaaserisaqarpoq.
Elisabeth Heilmann Sisimiuneersuuvoq, Sverigelli avannaani ukiut 30-t najugaqarsimalluni.
Isiginnaartitsisartutut Danmarkimi Tuukkak' Teateretimi Japanimilu ilinniarsimasuuvoq.
"Angerlarsimaffeqanngitsoq" Nunatta Isiginnaartitsisarfiani arfininngornermi ualikkut nalunaaqutaq sisamaniit takuneqarsinnaassaaq, isernerlu akeqanngilaq.