Saamit inuillu Issittoq pillugu nalunaarutaat

FN-ip Nunat Inoqqaavisa Pisinnaatitaaffii pillugit ataatsimeersuartitsinissaanut piareersaataasumik sapaatit akunneranni qaangiutilersumi ataatsimiittoqarpoq. Ataatsimeersuarneq 2014-imi ingerlanneqartussaavoq, saamilli inuillu pisussat sioqqullugit ataatsimiittoqarnissaanut issittoq pillugu nalunaarummik piariigaqareersimapput.
oktobarip 28-at 2012 13:30

Inuit Issittormiut Siunnersuisoqatigiiffiat ataatsimiinnermik aaqqissuisuuvoq, issittumiillu tamarmit saaminik inunnillu peqataaffigineqarluni. Ulluni marlunni ataatsimiittoqarnera oqalliffiulluarpoq, inerneraalu nalunaarut qulequtaaqqanik arfineq pingasunik imaqartoq, taannalu FN-ip 2014-imi ataatsimeersuartitsinissaanut piareersaataalluni.

- Taamatut angusaqarnerput nuannaarutigaara – taamaaliornikkut Issittormiuusugut 2014-imi ataatsimeersuarnissamut piareersaateqarnitsinnut tunngavissaqarlualerpugut. FN-p ullorititaani, oktobarip 24-iani, nunat inoqqaavisa nunarsuup sinneraniittut nalerassatut atorsinnaasaannik siunnersuutissavut imartuut naammassivagut, uagullu Inuit Saamillu FN-ip ataani isumaqatigiinniarnerit aallartinnissaannut maanna piareerluta, ICC Kalaallit Nunaata præsidentiata tullersortaa Hjalmar Dahl oqarpoq.

Nalunaarut matuma ataani atuaruk. Nalunaarut tuluttut allassimavoq.