Saamit inuiattut ullumikkut ullorsiorput
Isiginnaartitsisartoq Elisabeth Heilmann Blind, Kirunami Sverigemi najugaqartoq ima oqaluttuarpoq:
”Saamit inuiattut nalliuttorsiornerat assigiinngitsutigut malunnartinneqartarpoq, tassami Sverigimi kisimi nalliuttorsiutigineqarneq ajorpoq, kisiannili Ruslandimi, Finlandimi, Sverigimi Norgimilu nalliuttorsiutigineqartarpoq.
Peqatigiiffiit sumiiffinni assigiinngitsuneersut aaqqissuisarput allanillu annertunerulaartunik aaqqissuisoqartarpoq. Peqataarusuttut taamaalillutik ataatsimuualaarnissamut tamarmik periarfissinneqartarput, soorlu kaffisoqatigiinissamut, aamma oqalugiartoqartarpoq erinarsortoqartarlunilu.
Maani Kirunami najugaqarfitsinni rådhusimi ataatsimuualaarpugut. Tassani Saamit peqatigiiffiata aaqqissugaanik erinarsornerit, oqalugiartitsinerit aliikkusersueqatigiinnerlu ingerlanneqarput.
Tupaallannartumittaaq ullumi pisoqarpoq, tassami tikeraartorput Robert Peay II Qaanaameersoq Saaminut qilaatersorluni takutitsinermigut tunissuteqarpoq. Tamanna iluatsilluartutut oqaatigisariaqarpoq. Qilaatersortarneq pillugu oqaluttuarpoq, kiisalu kalaallit Saamillu inuiattut qanoq ataqatigiinnerat qilaatersornikkut takutitassiaralugu.
Elisabeth Heilmann Blind Kirunamit taama oqaluttuarpoq.
