Saamit inuiattut ullorsiorput

Ullumikkut – februaarip ulluisa arfernanni – Saamit inuiattut ullorsiorput. Kisianni soorlu maani juunip ulluisa 21-anni inuiattut ullorsioraangatta sulinngiffeqartartugut, taava Saamit Nunaanni - tassa Norgimi, Sverigimi, Finlandimi Ruslandimilu – Saamit inuiattut ullorsiortarnerat pisortatigoortumik akuerisaanngilaq.
februaarip 06-at 2008 05:46

Tamanna Sverigimi Saamit kattuffiata, Same Ätmanip allanngortikkusuppaa. Kattuffiup Saamit Inatsisartui, Sametinget, kajumissaarniarpai februaarip ulluisa arfernata Sverigimi nalliuttutut isigineqalernissaa, aamma Saamit erfalasuata pisortatigoortumik akuerineqarnissaa, sulissutigeqqullugit.

Saamit erfalasaat taamaallaat Norgimi, Norgip erfalasaata saniatigut – pisortatigoortumik akuerisaavoq. Taamaattumik Norgip Avannaani pisortat illuutaasa silataanni saamit erfalasuat qalipaatigissaaqisoq saamit inuiattut ullumikkut ullorsiorneranni amuneqarsimavoq.

Saamit ullumikkut inuiattut ullorsiortarnerannut pissutaavoq, Helsinkimi Saamit nunanit sisamaneersut siullermeerlutik, ataatsimoorlutik ajornartorsiutitik oqaluuseriniartlugit 1992-imi naapimmata.

Saamit inuiattut ullorsiornerat ataatsimeeqatigiinnikkut, joikerluni tusarnaartitsinernik, kaagisuunnernik, tuttullu neqaanik igaartornernik nalliussineqassaaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq