Saamit festivalianni nunarput sammineqassaaq
Aasaru juuli qiteqquppat, kalaallit nipilersortartut eqqumiitsuliortullu arlallit, nunat inoqqaavisa festivalerfigisartagaanut tusaamasamut, peqataajartorlutik aallassapput. Taakku kalaallit eqqumiitsuliornikkut kulturikkullu nutaaliornerinut takussutissiissapput.
Riddu Riddumik aaqqissuisut Nunatsinneersunik qaaqqusinermikkut, silap pissusaata allanngoriartorneranik aamma tamatuma naggueqatigiinnut Inunnut issittumullu sunniutaanik immikkut sammisaqarniarnerannut takussutissaavoq.
Nunarput immikkut sammillugu isumasioqatigiittoqassaaq, filminik takutitsisoqarluni, eqqumiitsulianik saqqummersitsisoqarluni nipilersortunillu tusarnaartitsisoqarluni.
Nipilersortartuni pingaarnertut peqataassapput nipilersoqatigiit "Torluut!", Nuummeersut. Taakku CD-mik qanittukkut saqqummersitseqqaartussaapput, Riddu Riddu festivalimi nipilersorfimmi pingaarnermi nipilersussallutik.
Uaajeernermik takutitsisussaaq tassaavoq, kalaaleq arnaq Elisabeth Heilmann Blind Sisimiuneersoq maanna Kirunami najugaqartoq.
Aamma Mikisoq H. Lyngep aamma Martin Mørckip eqqumiitsuliatut filmiliaat "Nordafar" takutinneqassaaq aamma eqqumiitsuliortutBuuti Pedersen aamma Gry Foss eqqumiitsuliornermik takutitsissapput.
Riddu Riddumik aaqqissuisut aamma neriorsuutigaat, festivali juulip aqqarnanni ammaanersiorneqarpat puisimik suaasalimmi mattammillu sassaalliisoqassasoq, festivali juunip 15-iata tungaanut pissaaq.
