Saaminik toqoraanissamik sioorasaarisoqarpoq
Norgimi Tromsømi atuarfimmi atuartut, toqoraasoqarnissaanik ullaarmanna sioorasaarisoqarnera pissutigalugu angerlarartinneqarput.Internetikkut nalunaarummi kikkut toqorarneqassanersut aamma allassimavoq, nalunaaruteqartullu kinaanerminik isertuussisup, toqorarneqartussat tassaanerarpai "Saamit".
Allattoq Elisa Isaksen
Sioorasaarut internetikkut ippassaq nalunaarutigineqarpoq, nalunaarummilu assitaliunneqarsimapput sakkut assigiinngitsut assingi, illoqarfiup Tromsøp assinga, aamma toqoraanerup sumi pinissaa - tassa atuarfimmi taaguuteqartumi Kongsbakken Videregående Skolemi.
Toqoraanerup qaqugu pinissaa nalunaarummi allanneqarsimanngilaq.
Atuarfiup qullersai, atuartut angajoqqaallu ullaarmanna atuarfimmi ataatsimiipput, politiillu atuarfiup silataani paarsitinneqartut, Danmarkip Radiuani taama allaaserineqarpoq.