Saalumuup Qeqertai malerujussuarnit eqqorneqareersullu sukannersumik naalakkersorneqalerput

Saalumuup Qeqertai Manerassuarmiittut sukannersumik naalakkersorneqalerput, sineriai malissuarnit eqqorneqareersullu. Ikinnerpaamik inuit 20-t ajunaarput illoqarfeeqqallu immamut qanittumiittut immamit aserorneqarput. Pisortat annilaanngatigaat toqusut amerlanerusinnaanerat, ajunaarnerup annertussusiata paasiniarluarneranut atatillugu.

Malerujussuit nunap sajunneranit pilersinneqarput nunallu sajunnera Richterip uuttuutaanik uuttorneqarami 8,1-iuvoq.

Saalumuup Qeqertaanni ministeriuneq Manasseh Sogavare naapertorlugu malerujussuit unnuakkut inuit sinileruttortut takkussimasuuppata ajunaartut amerlanerusimassagaluarput.

- Malerujussuit ulluunerani takkunnerat uatsinnut iluatsitsineruvoq, tassami inuit takusinnaagamikku imaq tinikkiartulersoq taamalu ajortoqalernera pasitsaassinnaallugu, Sogavare oqarpoq.

Saalumuup Qeqertaanni, tassa qeqertani aqqaneq-marluusuni, inuit millionit affaat najugaqarput.