Saaffigineqaqqaartoq isumaqatigiissitsiniartussatut akuersivoq
Mette Christensenilli isumaqatigiissitsiniarnissami aallartinnissaa suli ullulersinnaanngikkallarnerarpaa, tuaviornerpaamilli pinissaa oqaatigalugu.
Mette Christensenip isumaqatigiissitsiniartussanngornera IMAK-ip suli tusarsimanngilaa, ilinniartitsisullu kattuffianniit taamaammat tamatumunnga oqaaseqarumanngikkallarput.
Namminersorlutik Oqartussat isumaqatigiissutit pillugit immikoortortaqarfimmiit ima oqartoqarpoq:
- Qaqugu isumaqatigiinnialernissatsinnik erseqqissumik oqarnissamut siusippallaaqaaq. Kisianni neriunarpoq, sapaatip akunnerata uuma naalernerani akunerulluunnit tulliuttup aallartilaarnerani, Namminersorlutik Oqartussat Isumaqatigiissutit pillugit immikkotortaqarfimmi pisortaq, Rasmus Sembach, oqarpoq.
Ilinniartitsisut kattuffiata IMAK-ip, KANUKOKA-p kiisalu Naalakkersuisut akunnerminni isumaqatigiissusiaata siulliup qaangiunneraniit qaammatip tulliani ukiut marlunngussapput.
Isumaqatigiinniartut avissaartussutaasa pingaarnerit ilai tassaapput, ilinniartitsisut ilinniartitsinerulernissaannik, kiisalu ilinniartitsisut piffissamik qaangiisarnerinik ikilisarneqarnissaannut sulisitsisut piumasaqaataat.