S: Suliffimmut atatillugu ineqartitsineq atorunnaarsinneqassanngilaq

Sulifimmut atatillugu ineqartitsisarneq ungasinnerusoq eqqarsaatigalugu atorunnaarsinneqassasut, naalakkersuisut ineqarnermut ingerlatsinermut nassuiaatiminni allapput. Taamatut pilersaaruteqartoqarneq illuatungiliuttunit tapersersorneqaraluarpoq.
Allattoq Jaaku Lyberth
maajip 03-at 2012 06:57

KNR TV-p nutaasiassaqartitsiviata Qanoruup apriilip 26-ani aallakaatinneqarnerani suliffimmut atatillugu ineqartitsinermut attuumaassuteqartut arlaqartut oqaaseqartinneqareersullu, inatsisartuni illuatungiliuttut isumaat allanngorpoq.

Naalakkersuisut taamatut nalunaaruteqarnerat  eqqarsaatigilluagaarpasinngilaq pisariaqanngitsumillu aalassatitsivoq, Siumup politikkikkut oqaaseqartartua Per Berthelsen oqarpoq.

"Suliffimmmut atatillugu ineqartitsisarnerit atorunnaarsinneqarnissaannut eqqarsalernissamut piffissaanngilaq" aamma "aningaasartuutit uani pineqartut inuiaqatigiinnit isertitsissutaasinnaasunut sanilliullugu annikitsuaraannaapput " Per Berthelsen tusagassiuutinut nalunaaruteqarluni taamatut allappoq.

Sulifimmut atatillugu ineqartitsisarnerit atorunnaarsinneqarpata, sulisussatut pisariaqartinneqartut  avataaneersurt  pissarisinnaannissaat annertuumik akornuserneqassasoq, Per Berthelsen isumaqarpoq. 

Suliffimmut atatillugu ineqartitsinermut pisinnaatitaaffik sivikinnerpaamik ukiuni tallimanik sivisussuseqassasoq, Per Berthelsenip misissorneqarsinnaasoq  siunnersuutigaa, ukiullu tallimat qaangiunerisigut  inissiani najugaqartut namminneq initaarlutilluunniit ineqarnerminnut tunngasut allatut aaqqivigisinnaagaat, Siumup politikkikkut oqaaseqartua Per Berthelsen allappoq.

Namminersorlutik Oqartussat suliffimmut atatillugu ineqartitsinermut siorna 22 millioner koruunit atorpaat.

Sulifimmut atatillugu utaqqiisaagallartumik ineqartitsinermi annikitsumik akiliisitisaleraanni atuutilersuuppat, Namminersorlutik Oqartussat aningaasartuutaat suli ikinnerusunik tikisisitsinikkut akilerneqartalissagaluarput.

Namminersorlutik Oqartussat nuna tamakkerlugu 1629 suliffimmut atatillugu inissianik massakkorpiaq peqarpoq.