Sissami nanoqaratarsinnaammat Ittoqqortoormiut naluttarfittaarput
Nannut takkuteriasaartut meeqqanut ulorianarsinnaasarmata Kommuneqarfik Sermersooq immikkut ittumik iliuuseqarpoq, Ittoqqortoormiinimi illoqarfiup iluani aasaq manna nalutarfeerartaarput, innuttaasunit nuannarineqarluartumik.
Naluppaluttut meeqqallu illarpaluttut Ittoqqortoormiini innuttaasunut ulluinnarsiutaalerpoq. Tassa Kommuneqarfik Sermersooq illoqarfimmi nunatsinni avinngarusimanerpaani naluttarfeeraliorpoq. Meeqqat Qinngaaivani paarsisoqarnatik nalukkiartarnerat navianarpallaartoq, illoqarfiup peqqinnermi sunngiffimmilu aqutsisuqarfia naliliisimapput.
- Qinngaaivani meeqqat nalukkiartarnikuupput, angajoqqaat sulinerat nalaanni tamanna aamma pisarluni. Taamaattumik maani illoqarfimmi una pilersinniagarput pinngorpoq, nanoqartarnera peqqutaalluni. Nannut qaqugukkulluunniit tikissinnaasaramik, taava qinngaaivani aamma tikissinnaallutik. Imaassinnaagami meeraannaasut aamma tikittoqartoq, paarsisoqartuaannannginnami. Tamanna pinaveersaarniarlugu meeqqat maani illoqarfiup iluani periarfissippagut maani nalussinnaanerat, Charlotte Pike oqarpoq.
Qinngaaiva illoqarfiup kitaaniippoq, tamannalu nanoqarsinaasarlunilu umimmaqarsinaasarpoq.
Illoqarfiup naluttarfeerartaarnera innuttaasunut 350-isunut pingaaruteqarluartoq, 22-inik ukiulik Ittoqqortoormiuni inunngortoq peroriartornikorlu, Qinngaaivanilu imaani nillertumi nalukkiartanikoq, Trine Katrine Barselajsen, isumaqarpoq.
- Nuan, tulluusimaarnarsuaarpoq nuannersuaarpoq. Illoqarfipput mikigami taava inuttai ikittuaraallutillu. Assorujussuaq isumaqarsuaarpoq naluttarfittaarnitsinni. Meeqqallu nuannarersuaarpaat, Trine Katrine Barselajsen oqarpoq.
Meeqqanit alutorineqarpoq, taakkualu nuannaarnerat qungujulanerallu illoqarfimmioqataannut tunillaattarpoq.
- Susassaqannginnerungaatsiarami maani illoqarfipput Ittoqqortoormiuni. Taava soorlu meeqqat qaninnerulersillugit, soorlu kammagiinneq nuannaarneq takusinnaanngorlugu. Nuannaarsuaartaramik, taakani eqqaanut piinnarluni, meeqqat nuannaangaarmata, nuannaaqataannarsilluni, Trine Katrine Barselajsen oqarpoq.
Naluttarfeeraq aasaanerinnaani ammasarnissaa maanna pilersaarutaavoq, ukiorli naallugu ammasalernissaanut periarfissaqanersoq, peqqinnermi sunngiffimmilu aqutsisoq, Charlotte Pike, misissorniarpaa.
Nalunnguarfeeqqap ammanerani meeqqat kikkulluunniit tikilluaqqusaasut, Kommuneqarfik Sermersuup nittartagaani allapput. Naluttarfeeraq aqqanerniit tallimat tungaanut ammasarpoq.
Naluttarfeeraq juulip arfineq-pingajuanni atoqqaarfissiorneqartoq sanaartornermik suliffeqarfik ITT aamma Ittoqqortoormiini haalimi sulisut suleqatigalugit sanavaat.
