Immap naqqatigut kabeli tallineqartussanngorpoq
![](/sites/default/files/styles/image_934x467/public/user_pictures/EvaldsenLars_Nuuk__umiarsuaq_soekabel-imik_iluarsaasoq.jpg?itok=wrOC7ati)
Iluliarsuit immallu naqqata pissusaa pissutaallutik immap naqqatigut kabeli Ilulissanut ingerlateqqinneqarsinnaanngilaq. Tassungali taarsiullu sakkortusaavimmik annertuumik pisinnaasalimmik Aasianniit Qasigiannguanut Ilulissanullu attaveqartussamik pilersitsisoqassaaq.
Aammattaaq maannakkut sakkortusaaviup pioreersup Uummannamiit Upernaviup tungaanut tallineqarnissaa TELE-POST-ip pilersaarutigaa.
Suliaq tamakkiisoq innuttaasut 20.000-it oqarasuaateqarnikkut attaveqaateqarnerinut pitsanngorsaataassaaq, aningaasaliissuteqarnerullu inuiaqatigiinnut tamakkiisumik iluaqutaasussaanera TELE-POST-imit isumaqartoqarpoq.
- Ilinniartitaaneq, peqqissuseq, minnerunngitsumillu inuussutissarsiornerup ineriartornera, suliffeqarfinnillu namminersortunik pigineqartunik pilersitsiffiusinnaanera eqqarsaatigigaanni, inuiaqatigiit siumut alloriarujussuassapput, TELE-POST-ip siulersuisuini siulittaasoq Stine Bosse taama oqarpoq.
Avannaanut immap naqqatigut kabelissap Ilulissallu tungaannut sakkortusaaviup immikkut annertusakkap pilersinneqarnissaat 2017-ip aasaanerani ukiaaneranilu ingerlassasoq naatsorsuutigineqarpoq. Tamatumalu kinguninngua Uummannamiit Upernavimmut sakkortusaavik piaarnerpaamik atulersinneqalissaaq, TELE-POST tusagassiuutinut nalunaarummini taama allappoq.