Røde Korsip inuusuttut meeqqallu atugarliortut ikiorniarpai
Nunatsinni meeqqat inuusuttullu ajornartorsiutillit atugarissaarnerulernissaat anguniarlugu Danmarkimi Røde Korsip Inuusuttaasa suliniutaat, Kunngissap nuliatalu aningaasaateqarfianit qanittukkut aningaasaliiffigineqartoq, Kalaallit Røde Korsiat suleqatiginialerpaat.
Villumip Aningaasaateqarfianit 5 millionit koruuninik aningaasaliiffigineqarnikkut tamanna pissaaq, aningaasallu taakku Kalaallit Nunaannut taamaallaat atorneqassapput.
Ilinniagarsimannginneq, suliffissaaleqineq, kiserliorneq, imigassamik atornerluineq ilaqutariinniluunniit peqqarniisaartarneq. Kalaallit inuusuttut tamakku ulluinnarni ilaatigut ajornartorsiutigisarpaat, tamakkulu pitsanngorsarniarlugit aningaasaliissutigineqartut tassa atorneqassasut, Røde Korsip Inuusuttai allapput.
- Inuusuttut nukittuut inuusuttoqatiminnut atugarliortunut siunnersuisarsinnaanissaat Kalaallit Røde Korsiat suleqatigalugu anguniarniarparput, Danmarkimi Røde Korsip Inuusuttaani qullersaq, Anders Folkner Buhelt oqarpoq.
Taamatullu suleqatigiilernissaq Kalaallit Røde Korsiata qilanaareqaa.
- Inuusuttut atugarliortut ingerlariaqqinnissaannut inuttut piginnaaneqalersinniarnissaannut aningaasat iluaqutaassaqaat, Nuummi Røde Korsimi siulittaasoq, Lissi Olsen, aviisimut Frederiksberg Bladet-mut erseqqissaavoq.
Aningaasaliissutit atorlugit suleqataasussamik maanna atorfinitsitsinialerput. Inuusuttut qanoq sutigullu ikiorneqassanersut atorfinittussap sullissisussallu paasiniassavaat.