Ruth Heilmann uparuartuinermut akissuteqarpoq
Inatsisartut siulittaasuata Ruth Heilmannip inatsisartuini ilaasortat ilaasortaqatiminnik taasissussisarsimasut pillugit piffissami kingullermi sakkortuumik uparuartorneqarnini ukiortaamik pilluaqqussutimini akissuteqarfigaa.
Allattoq Louise M. Kleemann
januaarip 12-at 2009 07:35
Suliaq tamanna pillugu Siulittaasoqarfik 19. december 2008-mili inaarutaasumik oqaaseqareertoq, Ruth Heilmann erseqqissaavoq. Ilallngullugu Inatsisartut Siulittaasoqarfiat inatsisinik maleruagassanillu malitassaqarmat, tamanna paasilluarneqassasoq kissaatigissagaa.
- Kinaluunniit maleruagassamik unioqqutitsineq pillugu ajuallassimaarluni maleruagassanik atuuttunik soqutiginneqqusinani Inatsisartut Siulittaasoqarfiannut kaammattuuteqartoq, inatsisaatsuliornermik illersuisutut imminut inississaaq. Oqalliseqataasut ilaannut tunngatillugu tamanna immaqa ilisimasaqannginnermik patsisilittut utoqqatsissutissaqartinneqarsinnaavoq, tusagassiuutilli tamanna ilisimasareertariaqaraluarpaat, Ruth Heilmann allappoq.
