Ruth Heilmann: Simon Olsen anneruniarpoq

Naalakkersuisuni ilaasortap Simon Olsenip (S) naalakkersuisunit tunuarnerata kingorna inatsisartuni Aningaasaqarnermut Ataatsimiititaliami ilaasortassanik qinersisoqarpoq, tamannalu Simon Olsenip ataatsimiititaliami siulittaasunngorusunneranik peqquteqartoq, siulittaasumut sassaqataa Ruth Heilmann oqarpoq.

Siulittaasussarsiornermi pingasut, tassa Ole Thorleifsen Ruth Heilmann aamma Simon Olsen sassarput. Taasinermi siullermi Ruth Heilmann amerlanerpaanik taaguunneqarpoq, taamaattorli taasisitsisoqaqqittariaqarsimavoq, Simon Olsen siulittaasunngorusummat, Ruth Heilmannip taasisitsineq ajuusaarnartutut nalilerpaa:

- Aningaasaqarnermut ataatsimiititaliami ingerlalluaratta, siulittaasorlu Ole Thorleifseni siulittaasuulluarmat kissaatigisimanngikkaluarparput. Kisianni Simon Olsen sassariataarpoq, Aningaasaqarnermut Ataatsimiititaliamut iserusulluni, taamaalimmallu qinersisoqarpoq, Ruth Heilmann oqarpoq. Taasisitsisoqarmat Ruth Heilmann qulinik taaguunneqarpoq, Simon Olsen arfineq pingasunik Ole Thorleifsenilu arfinilinnik.

- Oqartoqarpoq uanga siulitaasunngortariaqartunga. Simuulli siulittaasussamut aamma qineqqusaarniarluni oqarpoq. Oqarporlu kissaatigilluinnarlugu nammineq siulittaasunngornissi, taamaanngippat misisigisimassalluni Siumuminngaanniit igitaasutut, Ruth Heilmann oqarpoq. Taamaalilluni aappassaannik taasisoqarpoq, taasinerup tulliani siulittaasussarsiortoqarluni.

-Taasinerit aappaanni naligiikkatta, makitsineqaqqugaluarakku kisianni taasisoqaqqippoq, taasisoqaqqinnermilu Simon Olsen 10-8-mik ajugaavoq. Ruth Heilmannip taasinerup taama ingerlnneqarnera tujorminartorujussuartut misiginerarpaa:

-Siulittaasorput ingerlalluaqisoq illua´tungiliuttunillu suleqatiginnilluaratta ingerlaqiinnarnissarput kissaatigaluarakku. Taasinerup ingerlnneqarnera naapertuarluarnertut nalilersinnaanagu Ruth Heilmann oqarpoq.

- Siulittaasoq ingerlalluartoq ingerlaannarsimasussaagaluarpoq, taannartaa uannut aamma tujorminartorujussuuvoq.

Taamaattorli Aningaasaqarnermut Ataatsimiititaliami taamatut inissiineq ataqqigini Ruth Heilmannip oqaatigaa.

- Inuit Ataqatigiinnit ilaasortaaqatitta Aqqalukasik Kanuthsenip, Siumup sassartitaa taaniarlugu aamma oqaaseqarpoq, illuatungliuttulli atassutikkut demokraatillu uanga taavaannga. Kisianni amerlanerussuteqartut isumaaat aallaavigalugu taamatut inerneqarpoq. Ruth Heilmannip oqaatigaa taasinerup siulliup kingorna siulittaasussarsiorluni taasisitsineq, Simon Olsenip Siumumit iginneqartutut misigisimanissamik oqaaseqarnerat kingorna aatsaat pinerarpaa. 

Ruth Heilmannip taasisitsinerit pillugit oqaaseqarnera, Siumut sinnerlugu inatsisartuni ilaasortaaqataata Isak Davidsenip ilumoornerarpaa. Isak Davidsen oqarpoq tunuarniarluni Simon Olsen oqaaseqarsimasoq, namminerli naliliinini naapertorlugu taamatut oqarnera pimoorussaanngitsutut nalilerini Isak Davidsen oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat