Ruth Heilmann: Pissanganaqaaq

Inatsisartut upernaakkut ataatsimiinnerat ullumi aallartippoq. Oqaluuserisassat 100-t sinneqarput, naallu oqaluuserineqartussat tamarmik immikkut pingaaruteqartutut nalileraluarlugit, Inatsisartut siulittaasuata Ruth Heilmannip oqaatigaa aluminiuliorfissaq pillugu aalajangiinissaq pingaaruteqarnerpaanut ilaasoq.
Allattoq Mads Lynge
marsip 04-at 2008 16:10

Oqaluuserineqartussat pingaaruteqartut allat pillugit ima oqarpoq:

- Nukissiorfiup aktienik piginneqatigiiffinngortinneqarnissaa uteqattaartuuvoq, isummerfigineqartariaqartutullu isikkoqarluni. Meeqqanut inuusuttunullu tunngasunik tapersiisarneq tapiisarnerillu pillugit nassuiaat soqutiginartunut aamma ilaavoq, Ruth Heilmann oqarpoq.

Ataatsimiinnermi oqaluuserineqartussat amerlammata, piffissaliussap iluani naammassineqarsinnaassanerpat? Ruth Heilmann ima akivoq:

- Soorunami neriuutigaarput ataatsimiinnerup sivisussusaa allanngussanngitsoq, aamma oqaluuserisassat amerlanerisi kingunerisaanik sapaatip akunneranik sivitsoreernikuugatsigu. Kisianni ataatsimiititaliat isumaliutissiissummik piareersaanissaminnut piffissaqarneruniarlutik qinnuteqaateqartarput, oqaluuserisassat kingusinnerusukkut suliareqqitassanngortinneqarsinnaasarlutik, Inatsisartut siulittaasuat Ruth Heilmann oqarpoq. Taanna inatsisartut siulittaasuattut qinigaanermi kingorna ataatsimiinnermik ammaavoq, piareersaanerillu iluatsimmata nuannaaqaluni.

Inatsisartut upernaakkut ataatsimiinnerat pilersaarutit malillugit ingerlassappat, maajip 15-iata missaani naammassineqassangatinneqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq