Kommunit kattunniarneqarnerisa naligiimmik iliorfigineqarnissaat sumiippa?
Imaluunniit nunaqarfimmik nutaamik pilersitsisoqalernerluni?
Maniitsup borgmesterianut, Søren Lyberth-imut, Sisimiullu borgmesterianut, Hermann Berthelsen-imut, kommunalbestyrelse-mut kiisalu tusagassiuutinut ammasumik allagaqaateqarnermigut, Siumut sinnerlugu inatsisartuni ilaasortaq, Ruth Heilmann, taama apeqquteqaateqarpoq.
Qeqqani kommunit kattussuunneqarnissaannut tunngatillugu Sisimiut aamma Maniitsup kommuniisa akornanni isumaqatigiinniarsimanerit naammaginannginnerarlugit, pissusissamisoortutullu ingerlanneqarsimannginnerarlugit, Ruth Heilmann taama apeqquteqaateqarpoq.
- Kangaatsiap Qeqqani kommuninut ilaatinneqalersuuppat tulluarluinnaraluarpoq, isummerfigissallugu pisariaqarpoq, innuttaasut partiillu tunulequtaasut tassani aamma isumasioqatigineqarsimasariaqaraluarput, Maniitsumilu innuttaaqataalluni taamatut tusagaqarneq naammaginanngilluinnarpoq, Ruth Heilmann oqarpoq, nangillunilu:
- Allaanngilaq Maniitsup kommunia samunga samungarsuaq nakkartitaasimasoq. Kommunit kattussuunnissaanik isuma pitsaasoq sumiippa? Inatsisartuni ilaasortaq aperivoq.
Maniitsumi innuttaasut tunoqqutiinnarlugit isumaqatigiinniartoqarsimanerarlugu, piaarnerpaamik nassuiaateqartoqarnissaa Ruth Heilmann-ip piumasaraa.