Ruth Heilmann: Matusiinnarneq akuerineqarsinnaanngilaq

Qaanaami innuttaasut pisinnaatitaaffiinik arsaaarneqarput, taamaammat naalakkersuisut piaarnerpaamik nassuiaateqarnissaat pisariaqartoq, inatsisartuni ilaqutariinnermut ataatsimiisitaliami siulittaasup tullia Ruth Heilmann oqarpoq.

- Kommunalbestyrelsep innuttaasullu nammineq kissaatigigaangassuk aatsaat matusisoqartartoq nalunnginnatsigu, isumaqarpunga taamatut aalajangerneq ullutsinnut naleqqutinngitsoq. Soorunami kissaatigaara Qaanaami innuttaasut allatuulli pineqassasut, tassalu illoqarfinni allani imigassaq matunngikkaluarlugu ajornartorsiutit aaqqinniarlugit iliuuserineqartartut assigalugit iliuuseqartarneq taanna orniginarneruvoq. Aamma ataatsimiisitaliap siulittaasua oqaloqatigaara, kissaateqarluta pisut pillugit Naalakkersuisunit nassuiaanneqaqqulluta. Aammalu isumaqarpunga pilersaarutaasut pillugit nassuiaanneqartariaqarluta.

Inatsisartuni ilaqutariinnermut ataatsimiisitaliami siulittaasup tullia, inatsisartunilu Siumut sinnerlugu ilaasortaq Ruth Heilmann taama oqarpoq. Aamma inatsisartuni ilaasortaq Agnethe Davidsen Siumut, Ruth Heilmann isumaqatigalugu naalakkersuisunut allagaqaqataavoq.

Aamma Atassut sinnerlugu inatsisartuni ilaasortaq, Kristian Jeremiassen isumaqarpoq, Qaanaami imigassanik matusineq ajortunut allanut sangutitsiinnassasoq.