Russit uuliamik tunisassiornertik aallartippaat
Russit uuliasioqatigiiffissuata, Gazpromip uuliamik Ruslandip avannaanit pisumit tunisassiornertik aallartippaat. Gazprom taannaavoq Greenpeacep illersuisuisa septembarimi qaqiffigeriagaat issittumi uuliasiorneq unitsinniarlugu.
Allattoq Apollo Jeremiassen
Uuliamik tunisassiornerup aallartinneqarnera uulia atorlugu nukissiuuteqarneq pillugu akerleriiffiusoq ukiullu qulit aallartinnermit kingusinaarluni aatsaat pilersoq, Reutersip allaaseraa.
Issittup imaa uuliarluinermik eqqorneqarpat tamanna mingutsitsinerujussuarmik kinguneqassasoq, avatangiisinik illersuiniaqatigiinnit ilaatigut Greenpeacemit miannersoqqutigineqareerpoq.
Issittumi uuliasiorneq Ruslandip aningaasaqarneranut Issittorlu pillugu pilersaarusiornermut pingaaruteqartuusoq, russit præsidentiata, Vladimir Putinip tamanut nalunaarutigereerpaa.