Russit umiarsuaat Kangianut Aqqutikkut ingerlaarniarput

Ruslandimi umiarsuaatileqatigiiffissuup Sovcomflotip Kinamut uuliamik gassimillu assartuisarnermini aqqut sivikinnerusoq atorniarpaa. Taama iliorniarput Kangimut Aqqutatikkoorlutik, pisarnermissut Suezip ikerasaliaatigoornatik.

Aqqutikkut tassuunaqquunnermikkut ingerlaarnerminni piffissaq atortagartik affaannanngortissavaat, taamalu piffissamik aningaasanillu atuinikinnerussallutik.

Russit umiarsuaat arsartuut siulleq aggustip 14-ianni Murmanskimit gassimik usilluni Kinaliarpoq. Umiarsuaq sikusiutinik marlunnik atomimik ingerlateqartunik ingiallorteqarpoq.

Sukkanerusumik akikinnerusumillu Asiamukartarnissaq siunertaasoq Evgeny Ambrosovip Sovcomflotimeersup Bloomberg News-imut oqaatigaa. Tamatumuunakkulli sikusiussuit marluk ilaatinneqarmata annerusumik ileqqaarfiusinnaanissaa ilimaginngilaa.

Siberiami Issittullu Kangiani uuliamik gassimillu Ruslandip tunisassiornerminik piorsaaniarluni pilersaarutigaa, matumani Kinami Asiamilu annertuumik tunisaqarsinnaanissani naatsorsuutigalugit.