Russit torersaalerput
Ruslandimi oqartussat Kangimut Aqqutaani misissuillutik aallartipput, taamaalillutik maskiinat atomip nukinganik atortussanngortitsiviit, Ruslandip issittumut sineriaanut kivisinneqarsimasut arlallit, qanoq innersut paasisaqarfiginiassagamikkik. Aviisimi The Barents Observerimi taama allaaserinnittoqarpoq.
Maanna taamatut saliisoqalerpoq, imartami tamaani siornatigut aqqutigineqakulanngitsumi, umiarsuit angallannerulernissaat naatsorsuutigineqarmat, eqqakkallu navianaatillit tamakkua ajoqusiinnginnissaat qulakkeerusunneqarmat.
Taamatut misissuinerup sapaatip akunnerinik qulinik sivisussuseqarnissaa naatsorsuutigineqarpoq, Chukotkalu angullugu ilaatigut ingerlanneqassalluni.
Russit oqartussaasui oqarput, sinerissami tamaani navianartunik eqqagarpassuaqartoq. Ilaatigut tamakkununnga ilaalluni nunarsuatsinni sikusiutip atomitortup siullerpaap, Leninimik atillip, maskiinaa, atomip nukinganik atortussanngortitsisartoq.
