Russit sikusiutaat Norgep sineriaaniitilluni ajunaalernermi kalerrisaarisoorsimasoq

- Ajornartorsiortoqanngilaq. Inuttat ajunngillat. Kalerrisaarineq taammatinneqarpoq, Ruslandimi imarsiorluni asssartuinermut oqaaseqartartoq taama oqaaseqarsimasoq Tass allaaserisaqarpoq.

Sikusiullu pilersaarutaareersut malillugit ingerlaaqqilersimasoq oqaaseqartartup nalunaarutigaa.

- Asuliinnaq kalerrisaarisoorneruvoq. Suut tamarmik pissusissamisut ipput, ingerlaqqippugullu. Nalunaartoq tassaavoq sikusiut "Tor", oqaaseqartartoq sikusiummit russit tusagassiutaannut taama oqarpoq.

Russit sikusiutaat inunnik 33-nik issimasoqartoq Norgep sineriaaniitilluni anorersualeruttornerani marlunngormat ullaassakkut ajunaalernermi kallerriigaluarsimasoq norskit annaassiniartartuisa ilisimatitsissutigaat.

- Sikusiutip maskiinaasigut ajornartorsiortoqaqqaarsimavoq, makiinaasali ilai aaqqeqqissimasut norskit annaassiniartartuisa nalunaarutigaat.

Russit maskiinatigut ajornartorsiornerminnik suli nalunaaruteqanngitsut Norskit annaassiniartartuisa umiatsiat kalittaatit sikusiummukaappaat.

Russit sikusiutaat Ålesundip kitaaniitillu marlunngormat ullaassakkut nal. 6.36 ajunaalernermi kalerrisaarisimasoq norskit nutaarsiassaqartitsiviat NTB allaaserisaqarpoq.

Sikusiut ajunaalernermi kalerrisaarisoorsimasoq norskit nutaarsiassaqartitsiviisa arlallit ullorornerani nalunaarutigaat.

- Norskit annaassiniartartuisa qulimiguuliutaat sikusiut qulangeqattaarpaa umiatsiallu kalittaatit marluk sikusiutip eqqaaniipput, norskit aviisiat VG taama allappoq.