Russit sakkutuuisa anisinneqarnissaat Buship piumavaa
Georgiami pisut pillugit ullumi oqalugiarnermini Ruslandip nunanit allanit isigineqarnerata ajorteriaannaanera præsident George W. Buship oqaatigaa, russillu sakkutuuisa Georgiamiit anisinneqarnissaat Ruslandip præsidentianut piumasaqaatigalugu.
Allattoq Louise M. Kleemann
aggustip 13-at 2008 13:08
USA-p præsidentia avaqqutaarinani oqarluaqattaarluni Russit akisussaasui avoqqaarai, oqarluni nalunagu Russit qanoq siunertaqarnersut, sakkutuullu Georgiamut isaanerisigut naalagaaffik avikkaat, tamannalu akuerineqarsinnaanngitsoq. Maanna USA-p nunanut allanut ministeria, Condoleeza Rice siullermik Parisiliassaaq, præsident Sarkozy oqaloqatigiartorlugu, Parisimiillu Geoargiami illoqarfiit pingaarnersaannut Tblisimut ingerlassaaq, USA-p Georgiap naalagaaffittut kiffaanngissuseqarneranik tapersersuinera naqissuserniarlugu. USA-miit nalunaarutigineqarpoq silaannakkut immakkullu sakkutuut angallataat atorlugit Georgiamut ikiuutissanik assigiinngitsunik pajutserniarlutik.
